Kosova gjendet mjerisht në vend të parë në botë për vdekjet nga Covid-19. Kjo bëhet e ditur në raportin e të dhënave të fundit mbi vdekshmërinë nga koronavirusi.
Sipas të dhënave, Kosova është aktualisht një nga vendet më të prekura nga koronavirus.
Kohët e fundit Kosova ka regjistruar 54.2 vdekje për milion banorë, duke lënë pas edhe Kolumbinë e cila ishte vendi me vdekshmërinë më të lartë në botë deri javën e kaluar.
Është e trishtë të konstatosh këtë nivel të lartë vdekshmërie në Kosovë, ku më tepër se gjysma e popullsisë 1.8 milionëshe është nën 25 vjeç.
Instituti Kombëtar i Shëndetësisë Publike, ka njoftuar se të shtunën janë regjistruar 9 të vdekur dhe 115 raste të reja me COVID-19 në Kosovë. Numri total i rasteve pozitive, me këto të fundit, ka arritur në 13.215.
Dje janë shëruar 116 pacientë derisa numri i përgjithshëm i të shëruarve deri më sot është gjithsej 9.355 raste. Numri i rasteve aktive është 3.352.
Shërbimi Spitalor dhe Klinik Universitar i Kosovës (SHSKUK) ka njoftuar të premten se në institucionet publike shëndetësore në Kosovë, aktualisht janë të shtruar 475 pacientë, prej tyre 370 janë të prekur me koronavirus. /a.r
