Kosova duket se po i drejtohet sërish zgjedhjeve të parakohshme parlamentare, pasi marrëveshja e mundshme midis Vetëvendosjes dhe LDK-së, duket se ka dështuar.
Lajmin e dha kreu i Vetëvendosjes, Albin Kurti, që në një video bën të ditur se ditën e nesërme do të shkohet në Kuvend pa një marrëveshje midis palëve që pritej të formonin koalicionin qeverisës.
Albin Kurti ka thënë se mbrëmë e ka bërë edhe një ofertë të fundit për LDK’në.
Në këtë ofertë thuhet se VV’së, si parti e parë, i takon kryetari i Kuvendit dhe nënkryetari i parë, e LDK’së nënkryetari i dytë.
Gjithashtu, Kurti ka kërkuar që çështja se kuj i takon presidenti të lihet për më vonë.
Lideri i Vetëvendosjes ka folur edhe për kërkesën e LDK’së për ndarjen e Ministrisë së Kulturës.
“ Sipas kërkesës së LDK, MKRS ndahet, me ç’rast Kultura dhe Rinia i kalojnë Ministrisë së Arsimit, Shkencës, Teknologjisë dhe Inovacionit, ndërkaq, Sporti i kalon Ministrisë së Shëndetësisë. Pakicat joserbe e marrin Ministrinë e Zhvillimit Rajonal ose të Pushtetit Lokal, kurse pakica serbe Ministrinë për Komunitete”, ka thënë ai.
