Masa e reciprocitetit që Qeveria e Kosovës ka vendosur për transportuesit nga Serbia do të vazhdojë edhe ditëve në vijim, shkruan “Koha Ditore”.
Ministrja e Tregtisë dhe Industrisë, Hykmete Bajrami, ka thënë se Serbia është fajtore për bllokimin e maunave. Ajo ka kujtuar se Serbia tash 8 muaj nuk lejon hyrjen e asnjë maune të Kosovës e cila është e pajisur me certifikata ADR të lëshuara nga institucionet e Kosovës.
Që nga data 24 mars, edhe Dogana e Kosovës nuk lejon hyrjen e automjeteve që bëjnë transportin e materialeve të rrezikshme në Kosovë nga Serbia. Qeveria e Kosovës ka marrë vendim që të mos e njohë certifikatën ADR (certifikatë kjo që lëshohet për mjete që transportojnë mallra të rrezikshme) për automjete, si dhe certifikatës ADR për shoferët të cilët ngasin automjete të rrezikshme, të lëshuara nga autoritetet serbe për transportuesit/eksportuesit e Serbisë të cilët realizojnë eksportin e derivateve të naftës dhe gazit në Kosovë.
Bajrami ka thënë se masa e reciprocitetit e vendosur javën e kaluar është hap i domosdoshëm për t’i mbrojtur kompanitë e Kosovës pas dështimit të bisedimeve me Serbinë.
