Interpol Tirana | Ekstradohet nga Spanja drejt vendit tonë, 31-vjeçari me masë sigurie “Arrest në burg”, për veprën penale “Korrupsioni aktiv i gjyqtarit, prokurorit dhe i funksionarëve të tjerë të drejtësisë ”, kryer në bashkëpunim.
Në vijim të punës së Zyrës Qendrore të Interpol Tirana, në bashkëpunim me homologët spanjollë, u bë arrestimi në Spanjë dhe ekstradimi drejt vendit tonë, i shtetasit shqiptar të shpallur në kërkim ndërkombëtar:
Dritan Dedja, 31 vjeç, banues në Tiranë, pasi Gjykata e Posaçme e Shkallës së Parë Tiranë i ka caktuar masën e sigurisë “Arrest në burg”, për veprën penale “Korrupsioni aktiv i gjyqtarit, prokurorit dhe i funksionarëve të tjerë të drejtësisë ”, kryer në bashkëpunim.
Në vitin 2019, shtetasi R. D. (vëllai i Dritan Dedja) është arrestuar për veprën penale “Prodhimi dhe shitja e narkotikëve. Pas arrestimit, 31-vjeçari dyshohet se i ka ofruar një shumë parash prokurorit, për ndryshimin e masës së sigurisë për vëllain e tij.
Arrestimet, Qershor 2021-Edmond Kariqi, kreu i Prokurorisë së Kukësit, u vendos në pranga me urdhër të SPAK. Ai u arrestua në qytetin e Kavajës i akuzuar për veprën penale “Korrupsioni pasiv i gjyqtarit, prokurorit dhe i funksionarëve të tjerë të drejtësisë”, e kryer në bashkëpunim.
Po në Qershor të këtij viti emisioni Stop publikoi edhe një tjetër rast si prokurori mbante në qeli një person edhe pse bëhej fjalë për ngatërrim identiteti.
Hetimet-Edmond Kariqi ishte mbajtur nën përgjim nga SPAK pas pushimit të një çështje ndaj 5 personave të arrestuar për trafik droge në nëntor të 2019-ës. Ata u lanë në arrest me burg nga gjykata deri në daljen e ekspertizës së drogës.
Emirjan Beu kishte hyrë në kontakt me Gegën i cili i kishte mundësuar lidhjen me prokurorin. Më pas Dritan Dedja, vëllai i njërit prej të arrestuarve udhëtoi nga Kavaja drejt Kukësit për të takuar prokurorin. Në përgjime është fiksuar Dritan Dedja t’u thotë të afërmve “të hënën dërgojmë paratë”.
Pak ditë më vonë Dedja ka shkuar në një pikë të këmbimit valutor në pronësi të babait të një tjetër të arrestuari dhe ka kthyer paratë nga dollarë në euro. Takimi mes Dedjas, Gegës dhe prokurorit është zhvilluar në një lokal dhe ky i fundit ka marrë 2 mijë Euro.
Emirjan Beu dhe Dritan Dedja u shpallën në kërkim, por gjykata caktoi arrest me burg në mungesë.
/a.r
