“Duam ta heqim qafe këtë virus dhe të kemi numrin më të vogël të mundshëm të vdekjeve. Nuk duam të jemi në të njëjtën situatë si Italia, jemi një vend shumë më i madh dhe situata mund të jetë shumë më e rëndë dhe ne nuk duam që të ndodhë”.
Është kjo deklarata e bërë nga Presidenti amerikan Donald Trump në një konferencë për mediat këtë të martë, lidhur me situatën e koronavirusit.
Ai shprehu bindjen se, “Do të fitojmë dhe do të fitojmë shpejt. Do të ringrihemi më të fortë se kurrë. Tani është momenti për të shëruar jetë, çdo gjë tjetër do të rregullohet”.
Trump iu kërkoi qytetarëve që të punojnë nga shtëpia nëse është e mundur dhe të shtyjnë udhëtimet që nuk janë të domosdoshme, ashtu sikundër grumbullimin mbi 10 persona.
Po ashtu ai tha se qeveria amerikane është në gjendje që të mbrojë shëndetin e njerëzve dhe të ekonomisë.
Në Itali numri total i të prekurve nga koronavirusi ka arritur në 31506, ndërsa i viktimave në 2503. Ndërkohë në SHBA, numri total i të prekurve ka shkuar në 6524 dhe 116 të vdekur.
/a.r
