Zëvendësministrja e Shëndetësisë Mira Rakacolli dhe drejtuesja e Departamentit të Sëmundjeve Infektive në Institutin e Shëndetit Publik, Silva Bino, iu janë përgjigjur disa pyetjeve lidhur me situatën e koronavirusit në vend.
Bino tha se ata që janë të vetëkarantinuar apo të vetizoluar, sistemi shëndetësor merr kontakt me ta nëpërmjet mjekut të familjes apo sistemit të shëndetit publik.
Lidhur me rastet që kanë nevojë për testim, drejtuesja e ISHP deklaroi se “Ne testojmë ato raste që kanë nevojë të testohen dhe të cilat paraqesin shenja të sëmundjes sepse duhet të kemi parasysh se jo çdo njeri që pretendon se është i infektuar, është i infektuar. Është e rëndësishme të testohen sipas rregullave”.
Pyetjes se sa kite disponohen, Bino ju përgjigj me fjalët se kanë kitet e mjaftueshme për të cilat mund të kryejnë testimet.
Por ajo mohoi që të ketë ndonjë laborator privat që kryen testimet.
“Kanë dalë shumë kite komerciale të po vlerësohen, por të gjitha duhet të vlerësohen në laboratorin e Virologjisë në Institutin e Shëndetit Publik”, deklaroi Bino.
Po ashtu ajo sqaroi se në përgjithësi në botë mosha e cila kërkon kujdes shëndetësor është mosha 60 vjeç, ndërsa mosha e cila kërkon kujdes intensiv është mosha rreth 80 vjeç, duke nënvizuar se “Mosha e personave që kërkon kujdes shëndetësor tek ne është 40 vjeç e lart. Mund të kemi pasur ndonjë rast 20-30 vjeç, por janë sporadike”.
Nga ana e saj zv.ministrja Rakacolli informoi se pacientët po monitorohen me kujdes dhe pacienti i parë, ka shënuar përmirësim të ndjeshëm.
“Po monitorojmë me shumë kujdes gjendjen e pacientëve. Gjendja e pacientit të parë është përmirësuar ndjeshëm, fatmirësisht nuk kemi asnjë rast në trajtim intensiv. Për analizat laboratori i vetëm i certifikuar nga Organizata Botërore e Shëndetësisë, është ai i Institutit të Shëndetit Publik”.
/a.r
