Koronavirusi vazhdon të vrasë. Të paktën 81 viktima janë regjistruar në Kinë, 76 prej tyre në provincën e Hubei, kurse numri i të infektuarve është rritur në 2744, nga të cilët mbi 1400 vetëm në zonën Wuhan.
Më i shpejt se Sars-i për t’u përhapur, edhe pse më pak i fuqishëm.
Ministri kinez i shëndetësisë Ma Xiaowei dhe zyrtarë nga Qendra për Parandalimin e Sëmundjeve Infektive nuk ia fshehin botēs që 2019-nCov, koronavirusi i ri me epiqendër në Wuhan dhe që ka ‘ardhur’ për të infektuar gjithë botën, është shumë më ngjitës sesa u mendua në fillim.
“Ne nuk kemi identifikuar akoma burimin e infeksionit dhe nuk jemi të qartë për rrezikun e mutacioneve dhe si përhapet sëmundja,”- tha Ministri Ma.
Fenomeni më shqetësues është se virusi ka një periudhë inkubacioni që mund të zgjasin deri në 14 ditë, dhe “mund të transmetohet midis njerëzve që nuk kanë shfaqur ende ndonjë simptomë”.
Kryetari i komunës Wuhan pranon një fakt që është i pabesueshëm: 5 milion njerëz janë larguar nga qyteti përpara se të merreshin masat e sigurisë, si psh kontrollet në aeroporte. Besohet se dhjetra mijëra prej tyre kanë qenë të infektuar të mundshëm.
Për më tepër, mikroorganizmi është i vështirë për tu ndjekur, sepse përhapet para se pacientët të kenë vërejtur se e kanë kontraktuar atë.
Dje, Organizata Botërore e Shëndetit (OBSH) regjistroi një rast të ri, atë të një qytetari vietnamez i cili ishte infektuar duke mos qenë asnjë ditë në Kinë.
Shkencëtarët e lexojnë këtë lajm si një faktor tregues i rrezikshmërisë dhe shpejtësisë së përhapjes së virusit.
Megalopolis Wuhan, me 11 milion banorë, një fabrikë 2019-nCoV, është i izoluar plotësisht.
Evakuimi i të huajve
Ndërkohë shumë shtete po organizojnë evakuimin e qytetarëve të tyre. Përveç Shteteve të Bashkuara, Japonisë, Francës dhe Rusisë, edhe Italia po shqyrton gjithashtu se si të largojë qytetarët e saj të bllokuar në Wuhan.
Që nga dita e djeshme, 45 njerëz u infektuan jashtë Kinës, përfshirë Hong Kongun, Macau, Tajlandën, Australinë, Malajzinë, Singaporin, Francën, Japoninë, Korenë e Jugut, Tajvanin, SHBA, Nepal dhe Vietnamin. Alarmi gjithashtu është rikthyer në Vjenë dhe Itali.
Coronavirus, nuk është klasifikuar ende serioz si SARS-i, i cili midis viteve 2002 dhe 2003 vrau 774 njerēz, por po gjeneron psikozë dramatike në kontinentin aziatik.
Dy spitale janë në ndërtim e sipër në Wuhan, ku ka në punë 24 klinika dhe 1600 mjekë vullnetarë kanë mbërritut nga Pekini për të ndihmuar kolegët.
Sipas agjencisë së lajmeve Bloomberg, kinezët po përdorin medikamentet e trajtimit të HIV për tu përballur me pneumoninë e shkaktuar nga 2019-nCoV.
/a.r
