Ministri i Shëndetësisë së Maqedonise së Veriut, Venko Filipçe, në konferencë për shtyp konfirmoi se në Maqedoninë e Veriut është shënuar viktima e parë nga virusi Korona, e cila është një grua nga Kumanova, ndërkaq deri në orën 12:00, numri i përgjithshëm i të infektuarve është 114.
“Bëhet fjalë për një grua 57-vjeçare nga Kumanova e cila ka ndërruar jetë mbrëmë vonë. Kur gruaja ka qenë e hospitalizuar në Kumanovë ka pasur simptoma të virusit korona dhe mjekët kanë marë mostra. Janë bërë dy teste, por që të dy kanë dalë negativ. Megjithatë, pasi ka pasur simptoma të virusit korona, mjekët kanë vazhduar ta trajtojnë si pacient të infektuar”, tha Filipçe.
Ministri sqaroi se pacientja ka ndërruar jetë pasi gjendja e saj është përkeqësuar.
“Pasi i është përkeqësuar gjendja e saj që është tipike për rastet me virusin korona, mjekët kanë vendosur që pas vdekjes të marrin edhe një mostër dhe në këtë test ajo ka dalë pozitive”, tha Filipçe.
Përveç gruas, është hospitalizuar edhe një djalë 33-vjeçar.
Sipas vendbanimit, deri më tani me COVID-19 janë regjistruar: Shkup (65), Dibër (36), Shtip (7), Kavadari (2), Ohër (2), Gostivar (1).
