Policia e Korçës jep detaje të reja në lidhje me kapjen e një sasie droge ditën e djeshme që po tentohej të trafikohej përmes kufirit të gjelbër për në Greqi. Mësohet se në pranga janë vënë Spartak Koçileri, 37 vjeç dhe Marsel (Melsi) Shaholli, 36 vjeç, të dy banues në fshatin Hoçisht- Devoll.
Po ashtu, në kërkim janë shpallur edhe dy persona të tjerë, përkatësisht A.H, 45 vjeç, banues në fshatin Miras-Devoll dhe R.K, 27 vjeç, banues në Hoçisht. Të katër personat, ditën e djeshme në bashkëpunim me njëri-tjetrin, në afërsi të piramidës 54, në fshatin Vidohovë-Devoll, kishin si synim të transportonin nëpërmjet kufirit të gjelbër për në shtetin Grek me qëllim trafikimi 2 çanta sportive dhe 1 thes, brenda të cilave kishte 121 pako me Cannabis Sativa.
Porsa kanë konstatuar shërbimet e Policisë Kufitare, të cilat po patrullonin vijën e kufirit të gjelbër dhe po afroheshin në drejtim të tyre, ata kanë fshehur lëndën narkotike. Duke përfituar nga dendësia e pyllit, janë larguar me shpejtësi në një distancë të largët.
Në vendngjarje nga shërbimet e Policisë u konstatuan dhe sekuestruan në cilësinë e provës materiale 2 çantat sportive dhe 1 thes plasmasi, me 121 pako të mbështjella me letër natriban me një peshë totale 48 KG lëndë narkotike Cannabis Sativa.
Lidhur më këtë ngjarje, blutë e Korçës kanë bërë me dije se materialet hetimore ia kanë kaluar Prokurorisë për Krimet e Rënda në Tiranë për veprën penale “Trafikim i narkotikëve kryer në bashkëpunim, mbetur në tentativë”.
MA.ME
