Mbahej në vëzhgim nga Policia, pas dyshimeve se ishte përfshirë në aktivitet të paligjshëm, kapet me armë dhe një sasi të konsiderueshme parash të pajustifikuara.
Një 54-vjeçar nga Korça ka përfunduar në prangat e Policisë pas një kontrolli të ushtruar në lokalin e tij. Prangosja në flagrancë u bë nga Specialistët për Hetimin e Krimit Ekonomik Financiar, pas dyshimeve që ishin ngritur mbi aktivitetin e D. Ç., banues në fshatin Dishnicë.
Ndonëse në lokalin e 54- vjeçarit nuk u gjet asgjë e paligjshme, efektivët e Policisë arritën të gjenin në njërin prej sirtarëve të banakut një shumë të konsiderueshme eurosh. Bëhet fjalë për rreth 10 mijë euro.
Pas kësaj, forcat e Policisë kanë ushtruar kontroll edhe në banesën e 54- vjeçarit. Në shtëpinë e tij private, në Dishnicë, nga kontrolli i imtësishëm u gjet një sasi edhe më e madhe parash, gjithashtu dhe një armë zjarri. Bëhet fjalë për 30 mijë euro, si dhe një armë zjarri e llojit pistoletë me mulli.
54-vjeçari është vënë në pranga në kushtet e flagrancës, ndërsa gjatë marrjes në pyetje, ai nuk ka qenë në gjendje të justifikojë shumën e parave prej 40 mijë euro.
Në bazë të hetimeve të deritanishme, Policia ka dyshime se D. Ç. është përfshirë në aktivitet të paligjshëm të organizimit të lojërave të fatit. Këtë aktivitet 54-vjeçari mund ta ketë kryer kohë më parë ose mund të vazhdonte ta kryente deri në ditët e fundit, por nga kontrolli në lokalin e tij, oficerët e Policisë nuk ishin në gjendje të zbulonin të dhëna për të provuar një gjë të tillë.
Pavarësisht kësaj, 54-vjeçari do të hetohet për armëmbajtje pa leje, si dhe për pastrim parash. “Specialistët për Hetimin e Krimit Ekonomik Financiar, në Drejtorinë Vendore të Policisë Korçë bënë arrestimin në flagrancë të shtetasit D. Ç., 54 vjeç, banues në fshatin Dishnicë, Korçë.
Nga informacione të siguruara në rrugë policore, si edhe nga kontrolli që shërbimet e Komisariatit të Policisë Korçë ushtruan në lokalin dhe më pas në banesën e tij, në cilësinë e provës materiale iu gjetën e u sekuestruan një armë zjarri tip pistoletë me mulli, me 6 fishekë luftarakë pa leje, si edhe rreth 40 000 euro, sasi monetare kjo e pajustifikuar nga 54-vjeçari.
Shtetas D. Ç., dyshohet të ketë konsumuar elemente të veprave penale ‘Mbajtja pa leje dhe prodhimi i armëve, armëve shpërthyese dhe i municionit’ dhe ‘Pastrimi i produkteve të veprës penale ose veprimtarisë kriminale’. Materialet i kaluan Prokurorisë pranë Gjykatës së Shkallës së Parë Korçë për veprime të mëtejshme”, bëhet e ditur nga Policia. /l.m
