Drejtori ekzekutiv i sekretariatit të Komitetit Europian të Energjisë, Janez Kopac e ka quajtur zgjidhje e duhur marrëveshjen e Shqipërisë për zgjidhjen me mirëkuptim të arbitrazhit me kompaninë çeke CEZ. Kopec ishte i pranishëm sot në Komisionin Parlamentar të Veprimtarive prodhuese, ku tha se Shqipëria gjendej përpara domosdoshmërisë për të mos u përballur në arbitrazh, gjë që do të fuste në ngërç sektorin energjetik.
“Kam thënë se marrëveshja qe zgjidhja e duhur pasi në njëfarë mënyre Shqipëria ishte peng i kësaj përplasjeje. Dhe siç e shikoni, është shënuar një ecuri e jashtëzakonshme e reformave energjitike në Shqipëri. Nëse kujtoni raportin e implementimit të para dy viteve, Shqipëria ishte e fundit në rajon kur vinte fjala te reformat”, u shpreh Janez Kopac.
Lidhur me bllokimin nga Serbia të interkonjeskionit Shqipëri-Kosovë, Kopac tha se çështja është shndërruar qëllimisht nga pala serbe në ngërç politik.
“Serbët me shumë zgjuarsi bindën organizatën e transmetuesve evropianë të vinte kusht që Kosova e Veriut të furnizohej me energji nga një transmetues serb. Në këtë mënyrë u politizua një çështje mjaft teknike. Tashmë organizata e transmetuesve e di që kjo nuk qe një zgjidhje e mirë dhe po kërkon mundësinë për ta ndryshuar këtë marrëveshje, duke e hequr këtë kusht politik. Për momentin nuk mund të them se është gjetur një zgjidhje”, tha Janez Kopac.
Kopac ka prezantuar në Kuvend Raportin Vjetor të Sekretariatit të Komunitetit të Energjisë. Ai e konsideroi si shumë të rëndësishme reformën e deritanishme në sektorin energjetik, por tha se duhet vijuar më tej me përmirësimin e legjislacionit dhe liberalizimin e tregut.
