PEQIN/TIRANE- Rastet kur brenda qelive zbulohen sende të jashtëligjshme, nuk janë të panjohura në burgjet e vendit tonë. Kështu në sajë të kontrolleve të ushtruara dje në disa institucione të vuajtjes së dënimit, në një qeli në burgun e Peqin, në dhomën e të dënuarit me inicialet A.D., u gjet një sasi kanabisi. Burime nga Ministria e Drejtësisë bënë me dije se këtij shtetasi iu gjetën 3 doza me kanabis, të cilat thuhet se i shpërndante në burg.
Një tjetër kontroll është kryer në burgun e Vaqarit, pas informacioneve se të paraburgosurit D.R. dhe S.K. mbanin një telefon celular. Nga kontrolli i dhomës së tyre u konstatua i fshehur në njërin nga krevatet një aparat celular model iPhone.
I paraburgosuri S.K., i cili ishte dhe prezent gjatë kontrollit pranoi autorësinë e këtij celulari.
Shërbimi i Kontrollit të Brendshëm në Burgje do të intensifikojë punën operative për zbulimin dhe kapjen e sendeve të ndalura në burgje në funksion të forcimit të sigurisë së brendshme në këto institucione.(BW)
