Një agjenci shtetërore e Teksasit nuk ka gjetur asnjë shkelje gjatë një hetimi që ka zhvilluar ndaj Shkollave Publike “Harmony”, që është një operator i shkollave charter me qendër në Hjuston, për të cilat thuhet se janë të lidhura me armikun më të madh politik të presidentit turk dhe që akuzoheshin për një varg shkeljesh fiskale.
Akuza u hodh prej një studioje ligjore me qendër në Uashington që punon për qeverinë turke, e cila pati deklaruar se këto shkolla janë të lidhura me Fethullah Gylenin. Megjithatë, Agjencia për Edukimin e Teksasit ka konfirmuar ditën e hënë se të gjitha akuzat lidhur me keqmanaxhimin financiar të këtij rrjeti shkollash nuk kanë as bazën më të vogël, ndaj edhe e deklaronte të mbyllur këtë proces hetimor.
Një tjetër ndër akuzat e përçartura të kësaj studioje ligjore ishte hedhja e “dyshimit” se shkollat që bëjnë pjesë në këtë rrjet janë mbështetur edhe nga agjencia amerikane për arsimin. Në akuzë thuhej se shteti amerikan u ka dhënë këtyre shkollave plot 26,7 milionë dollarë, të cilat janë dhënë me premisën e “nxitjes së mësuesve” për t’u aktivizuar në programet e këtyre shkollave. Mirëpo kjo është një procedurë publike e Shteteve të Bashkuara kundrejt rrjetit të shkollave charter, qofshin ato të frymëzuara prej lëvizjes “Gylen” apo ndonjë tjetre.
Panorama/d.i.
