Dr. Altin Sholla
Në një realitet akademik dhe ekonomik në ndryshim të vazhdueshëm, modeli arsimor i Tirana Business University (TBU) po shfaqet si një praktikë novatore dhe e qëndrueshme për integrimin e studentëve në tregun e punës. Duke kombinuar edukimin teorik me përvojën praktike, ky institucion ka ndërtuar një model dual që jo vetëm përgatit profesionistë të aftë, por kontribuon në stabilitetin social dhe ekonomik të vendit.
Një nga aspektet më të rëndësishme të këtij modeli është harmonizimi i mësimdhënies teorike me aplikimin e saj praktik. Studentët e TBU nuk kufizohen vetëm në njohuri të literaturës akademike, por e zbatojnë atë në situata reale pune, duke përfituar një përvojë të drejtpërdrejtë profesionale. Kjo qasje i ndihmon ata të zhvillojnë aftësi praktike, duke krijuar një urë të qëndrueshme midis auditorit dhe tregut të punës.
Një tjetër faktor kyç është mundësia që TBU u ofron studentëve për të nisur një karrierë që në vitin e parë të studimeve. Falë bashkëpunimeve me biznese dhe korporata shqiptare, shumë studentë sigurojnë pozicione si junior specialist në fusha të ndryshme, duke pasur një avantazh të jashtëzakonshëm krahasuar me bashkëmoshatarët e tyre. Kjo përvojë jo vetëm që i lidh studentët me profesionin e tyre të ardhshëm, por gjithashtu forcon lidhjen e tyre me vendin e punës dhe hap rrugën për rritje profesionale brenda kompanive ku angazhohen.
Ky sistem dual i edukimit dhe punësimit i shkrire me vizionin gjithëpërfshirës të Grupit BALFIN ku TBU bën pjesë, ka edhe një ndikim të thellë sociologjik. Në radhë të parë, ndihmon në reduktimin e braktisjes së studimeve për arsye ekonomike, pasi studentët mund të sigurojnë të ardhura gjatë studimeve të tyre. Së dyti, parandalon punësimin e tyre në sektorë të papërshtatshëm me profesionin e tyre të ardhshëm, duke siguruar një zhvillim të drejtë dhe të natyrshëm të karrierës. Së fundi, kontributi më i rëndësishëm i këtij modeli është frenimi i emigracionit masiv të të rinjve. Duke pasur mundësinë për të ndërtuar një të ardhme të qëndrueshme në Shqipëri, studentët e TBU po ndihmojnë në tkurrjen e porozitetit demografik dhe në krijimin e një brezi profesionistësh të lidhur me vendin e tyre.
Në një kohë kur shumë të rinj e shohin të ardhmen jashtë kufijve të Shqipërisë, modeli i TBU përfaqëson një alternativë të qëndrueshme dhe një mekanizëm efektiv për ndërtimin e një tregu pune të fortë dhe të qëndrueshëm në vend. Për më tepër, duke u fokusuar në fushat e biznesit dhe teknologjisë, TBU po formon profesionistët e së nesërmes, të cilët do të udhëheqin inovacionin dhe zhvillimin ekonomik të vendit. Programet e universitetit janë të orientuara drejt teknologjisë së informacionit, menaxhimit të bizneseve dhe sipërmarrjes, duke pajisur studentët me aftësitë e nevojshme për t’u bërë liderë në sektorët më të rëndësishëm të ekonomisë digjitale. Përmes kurseve të specializuara, projekteve praktike dhe mentorimit nga ekspertë të industrisë, studentët e TBU po përgatiten për të adresuar sfidat e tregut global dhe për të sjellë risi në sektorin e biznesit dhe teknologjisë. Në 15 vite, Tirana Business University, thellon vizionin afatgjatë jo vetëm në kontributin për arsimin e lartë, por edhe përgatitjen e profesionistëve të specializuar në tregun shqiptar.
