Kontrata e re e Elseid Hysaj me Napolin, gati-gati po kthehet në telenovelë. Në fakt, ashtu si kanë rrjedhur ngjarjet dhe lajmet e prodhuara nga kjo çështje, i ngjajnë një serilai të gjatë, fundi i të cilit duket afër. Këtë gjë e ka konfirmuar agjenti i futbollistit shqiptar për mediat italiane.
Mario Giuffredi, që mbron të drejtat e kartonit të Hysajt, është shprehur se javën e ardhshme do të ketë një takim me numrin një të klubit të Napolit, për të vendosur përfundimisht çështjen e rinovimit të kontratës së mbrojtësit shqiptar.
“Bisedimet kanë nisur kohë më parë dhe në ditët e ardhshme do të takohem me presidentin e Napolit, për të parë nëse është e mundur për të nënshrkuar një kontratë të re”-është shprehur Giuffredi, duke konfirmuar takimin me Aurelio De Laurentiis.
Në fakt ajo që i ka penguar palët deri më tani, për të nënshkruar një kontratë të re, është kërkesa e Elseid Hysaj për rritje të pagës. Aktualisht futbollisti shqiptar përfiton 1.8 milion euro te Napoli për një sezon, ndërsa me kontratën e re, kërkon që kjo shumë të jetë 3 milion euro.
Mirëpo klubi ofron vetëm 2.5 mln euro, duke mbajtur pezull firmën. Gjithsesi të dyja palët janë të interesuara për të vijuar bashkëpunimin, ndaj pritet dhe arritja e marrëveshjes.
/b.d
