Në kuadër të operacionit policor të koduar “Ari i zi” është ndaluar 59-vjeçari me iniciale E.S., i cili ishte shpallur në kërkim si një nga organizatorët e dyshuar të kontrabandimit nga Tunizia të 670 000 litrave naftë.
“59-vjeçari dyshohet se në bashkëpunim me shtetasin F. B. (aktualisht në kërkim), ka organizuar kontrabandimin me anije, nga Tunizia, të 670 000 litrave naftë, nëpërmjet fshehjes së sasisë, në balastrat që shërbejnë për balancimin e mjetit lundrues“, njofton Policia.
Gjatë operacionit “Ari i zi”, u arrestuan në flagrancë më herët 3 persona dhe u proceduan në gjendje të lirë 5, të gjithë pjesëtarë të ekuipazhit të anijes.
Vijon puna për kapjen e shtetasit F. B., si dhe hetimet për të dokumentuar plotësisht rrethanat e këtij rasti. Materialet procedurale i kaluan Prokurorisë, për veprime të mëtejshme.
