Bindjet politike janë kthyer në mollën e sherit mes dy punonjëseve të poliklinikës në Ersekë.
Shefja e financës në këtë poliklinikë, një grua 55-vjeçare, është dhunuar fizikisht nga shefja e personelit dhe shkak është bërë angazhimi i tyre politik në dy forca të ndryshme.
Sipas të dhënave, Kristina Stoja me detyre shefe finance e angazhuar me LSI është sulmuar në ambjentet e poliklinikës nga shefja e personelit, Dorina Tallo 32 vjeç.
Autorja, mbështetëse e PS e ka kërcënuar 55-vjeçaren me largim nga puna nëse ajo nuk votonte PS, ndërsa e ka dhunuar fizikisht duke i shkaktuar shenja në fytyrë dhe i ka thyer syzet optike.
Mësohet se gjithçka ka nisur në zyrën e shefes së financës, ku autorja ka shkuar dhe ka nisur të grindet e t’i bëjë presion të dëmtuarës.
Edhe pse 55-vjeçarja është përpjekur ta shmangë sherrin dhe ka lënë institucionin për të shkuar në bankë, ajo është ndjekur nga 32-vjeçarja dhe nëna e saj.
Sipas kallëzimit të bërë nga Stoja, nënë e bijë e kanë ndjekur gjatë rrugës për në Poliklinikë duke bërtitur me fyerje e sharje dhe sapo ka hyrë tek shkallët Tallo ka nisur ta godasë fizikisht duke i shkaktuar dëmtime në fytyrë, thyerje të syzeve optike dhe dëmtime të tjera.
Menjëherë 55-vjeçarja ka denoncuar në polici rastin dhe uniformat blu kanë nisur procesimin penal në gjendje të lirë ndaj 32 vjeçares.
Njoftimi i policisë:
Procedohet penalisht në gjendje të lirë shefja e Burimeve Njerëzore pranë Drejtorisë së Shëndetit Publik, për veprën penale: “Dëmtime të tjera me dashje”.
Specialistët e Seksionit për Krimet në Komisariatin e Policisë Kolonjë, filluan procedimin penal në gjendje të lirë ndaj shtetases:
D.T, 30 vjeçe, banuese në Ersekë (me detyrë shefe e Burimeve Njerëzore pranë Drejtorisë së Shëndetit Publik Ersekë).
Procedimi ndaj saj filloi pas kallëzimit të bërë më datë 21.06.2017, nga shtetasja K.S, 55 vjeçe, banuese në Ersekë, me detyrë shefe Finance pranë kësaj Drejtorie, e cila ka deklaruar se shtetasja D.T, në ambientet e Poliklinikës të qytetit të Ersekës, për motive të dobëta, e ka fyer dhe goditur në fytyrë këtë të fundit. Materialet i kaluan Prokurorisë të Rrethit Gjyqësor Korçë për veprime të mëtejshme.
