Konfindustria shpreh shqetësimin për numrin e lartë dhe në rritje të akteve kriminale të grabitjeve ndaj bankave dhe transportit të mjeteve monetare në vend, duke i’u referuar rastit të fundit të së enjtes në Qafë Kashar.
Administratori i përgjithshëm i Konfindustria, Gjergj Buxhuku, në një reagim të ditës së sotme thotë se shqetësimi bëhet edhe më i thellë, kur vlerëson mungesën e plotë të përgjegjshmërisë dhe mosveprimin e një numri të tërë të institucioneve licencuese shtetërore dhe vetë sistemit bankar, në marrjen e masave të sigurisë parandaluese në kushtet e grabitjeve të njëpasnjëshme.
Konfindustria vlerëson, se shtimi i dukshëm i rasteve të grabitjeve të bankave përveç dëmit financiar dhe garancisë për depozitat e qytetarëve shqiptarë, njëkohësisht është goditje e pastër në sigurinë e të bërit biznes në përgjithësi në vend me pasoja dëmesh të mëdha ekonomike shumëpërmasore.
“Sa më sipër është e qartë, nëse vlerësojmë, se nga grabitjet në shtim të bankave, duke filluar me rastin e shëmtuar në thesarin e Bankës së Shqipërisë, kemi prekje të drejtpërdrejtë të fuqisë konkurruese të Shqipërisë në tërheqjen e investimeve të huaja edhe kështu në nivel mjaft të ulët”, thuhet më tej.
Konfindustria i kërkon Bankës së Shqipërisë si institucioni përgjegjës vëzhgues dhe rregullator bankar, që përpara se të merret me politika makro të padobishme në pjesën dërrmuese të tyre, të marrë sa më shpejt masat dhe kontrollet e nevojshme për të kërkuar arritjen e domosdoshme ne standardet e sigurisë të parave të shqiptarëve si detyra parësore e përligjjes historike të krijimit të sistemit bankar, duke filluar nga vetja e saj. Në këtë linjë thuhet se është e domosdoshme, që standardet e domosdoshme të sigurisë së bankave dhe investimet përkatëse të jenë kusht parësor në licencimin e tyre dhe në vazhdimësi.
Konfindustria kërkon kryerjen sa më shpejt të përmirësimeve ligjore për t’i dhënë të drejtën e patjetërsueshme Policisë së Shtetit për sigurimin e transportit të vlerave monetare, natyrisht kundrejt pagesave përkatëse të institucioneve bankare dhe financiare në vend.
