Konferenca e Kryetarëve është mbledhur gjatë ditës së sotme për të shqyrtuar kërkesën e Partisë Demokratike për ngritjen e një komisioni hetimor për marrëveshjen e qeverisë me kompaninë ÇEZ.
Në përfundim të mbledhjes, deputeti demokrat Edmond Spaho tha se u la kohë për konsultime deri ditën e enjte.
Spaho tha se mazhoranca po përdor truke për penguar punën e opozitës për të hetuar zgjidhjen me mirëkuptim të marrëveshjes me CEZ.
“Mazhoranca përdor truke duke propozuar që komisionit të propozuar nga ne t’i zgjerohet fusha e objekti i studimit, duke hetuar edhe gjatë viteve që funksionoi privatizimi. Ne nuk jemi kundër hetimit të çdo periudhe qoftë të privatizimit e më tej. Është e drejta e mazhorancës ta kërkojë këtë komisionin. ne do t’i japim edhe votat e opozitës që të hetohet kjo çështje. Le të hetohet e gjithë periudha që nga privatizimi e gjithë funksionimi, por me këto marifete nuk mund të pengojë punën e opozitës për të hetuar zgjidhjen me mirëkuptim të kontratës mes qeverisë shqiptare dhe CEZ. U la që të vijohet deri të enjten me konsultime.
Po vazhdohet me praktikat e moszbatimit të vendimeve të Kushtetueses. Këto praktika po vazhdojnë edhe sot. Fakti që opozita është në një marrëdhënie të kushtëzuar me parlamentin ka të bëjë pikërisht me moszbatimin e vendimeve të Kushtetueses”, tha Spaho.
