Kryeministri i vendit Edi Rama deklaroi gjatë Konferencës së Donatorëve të organizuar nga Bashkia e Tiranës së Bashkimi Evropian duhet t’i ndalojë së ëndërruari shqiptarët për të, duke nënkuptuar përshpejtimin e rrugës së integrimit.
“BE ka për detyrë të na bëjë të ndalojmë së ëndërruari se ne ëndërrojmë aq shumë për BE sa bëhemi “bezdi” për miqtë tanë evropianë”, tha Rama.
Duke u kthyer te aktiviteti për donacionet, Rama deklaroi se tashmë ndryshe nga e shkuara, partnerët ndërkombëtarë dhe bizneset janë kthyer në partnerë të rëndësishëm që ofrojnë dhe ndihmojnë me financa. Duke u rikthyer edhe në kohën kur ai ishte kryebashkiak, Rama kujtoi se në të shkuarën partnerët mbanin shënime, por nuk financonin projekte.
“Ka ndodhur një ndryshim që unë mund ta dëshmoj edhe personalisht, ishte një kohë kur në zyrën e kryetarit të Bashkisë Banka Botërore vinte vetëm për të marë shënime lidhur me çfarë mendonte kryetari Bashkisë për zhvillimin e vendit, dhe pyetjes së kryetarit se çfarë mund të bënin, merrte përgjigjen që ju keni shumë gjëra për të bërë por nuk përputhen me programin tonë.
Sot është në ndryshim, dhe janë që të gjithë të gatshëm për të mbështetur këtë vizion transformues të kryetarit të Bashkisë dhe administratës së re që ka nevojë për shumë mbështetje për tu materializuar.
Këtu nuk mungon asnjë nga partnerët dhe miqtë që kanë shoqëruar rrugën tonë, duke bërë bashkë me ne dhe shumë gabime”, tha –Rama.
***
Ka nisur punimet Konferenca e Donatorëve, një forum i organizuar nga Bashkia e Tiranës ku janë mbledhur bashkë të gjithë financuesit e ndryshëm të cilët do të njihen me mbi 100 projekte konkrete për kryeqytetin.
Në hapje të këtij aktiviteti mbajti fjalën kryetari i Bashkisë së Tiranës Erjon Veliaj, i cili përmendi disa prej objektivave kryesore që synohen të realizohen nëpërmjet financimit të donatorëve.
Veliaj deklaroi se nëpërmjet këtyre projekteve synohet ti jepet fund mësimit me dy turne, duke ndërtuar ambjente të reja mësimore.
“Do zgjidhim çështjen e mësimit me dy turne, të cilit do ti japim fund”, tha Veliaj.
Veliaj përmendi më tej edhe objektivat për modernizimin e transportit urban, një temë mjaft e debatuar kjo së fundi. Ai theksoi se do të vijohet me realizimin e korsive të biçikletave në të gjithë Tiranën si dhe konkludimin e projekteve për dy terminale për autobusët.
“Ëndrra ime nuk është që çdo i varfër të ketë një automjet, por ëndrra ime është që çdo i pasur të hipë në autobus. Po ashtu do përpiqemi që të realizojmë korsitë e biçikletave, nuk mjafton një korsi që kemi realizuar në hyrje të Tiranës. Do ndërtojmë dy terminale për autobusët në Tiranë”, tha Veliaj.
