Të shtëna me armë kanë tronditur mbrëmjen e sotme zonën e Komunës së Parisit në kryeqytet.
Kanë qenë banorët e zonës ata që kanë telefonuar pranë sallës operative të policisë. Menjëherë blutë e kryeqytetit, përkatësisht shërbimet e Komisariatit Nr.2 dhe Shqiponjat janë vënë në lëvizje dhe kanë shkuar në vendngjarje. Denoncimi qytetar ka ardhur edhe pranë agjencisë BalkanWeb, ku thuhet se njerëzit janë terrorizuar nga të shtënat dhe kanë boshatisur lokalet.
Sipas burimeve fillestare, nga të shtënat nuk raportohet për persona plagosur. Policia dyshon se bëhet fjalë për një konflikt të momentit.
Policia sqaron se të shtënat janë dëgjuar rreth orës 21:05 mbrapa Qendres “Kristal” dhe kanë ardhur nga një mjet tip BMW X5, me targa të pa identifikuara, ku udhëtonin disa persona të paidentifikuar. Dyshohet se njëri prej tyre ka qëlluar në ajer dhe më pas janë larguar.
Pas njoftimit policia ka mbërritur në vendin e ngjarjes ku u raportua për të shtëna dhe ka nisur hetimet për autorët dhe sqarimin e rrethanave, ndërsa ka ngritur dy postblloqe te zona e Kopshtit Zoologjik dhe në Kombinat.
Por nga të dhënat e para raportohet se mund të ketë qenë një konflikt i momentit që mund të ketë sjellë edhe të shtënat në ajër.
