Përfaqësues të Ministrisë së Mbrojtjes kanë prezantuar sot në Komisionin e Ekonomisë propozimin ligjor për krijimin e kompanisë së prodhimit të armëve dhe municioneve.
Në propozimet e diskutuara në Komision, deputetja e Partisë Demokratike, Jorida Tabaku theksoi se kjo është një nismë që mund të ketë efekt pozitiv për ushtrinë shqiptare dhe buxhetin e shtetit.
Megjithatë, sipas saj, duhet shpjeguar procedura dhe ajo që përmban ligji lidhur me sigurinë kombëtare dhe aksionet e kompanisë.
“Ju e keni quajtur kompaninë KAYO dhe dihet që Shqipëria ka prodhuar municione në kohën e regjimit komunist por prej 30 vitesh është lënë në harresë. Kjo do të thotë që ushtria ka prona dhe asete fizike. Ne jetojmë në një realitet tjetër dhe Shqipëria është vend i anëtar i NATO që do të thotë ka disa detyrime për të përmbushur edhe në fushën e prodhimit dhe shitjes së armëve. Projektligji fokusohet tek ngritja e një kompanie dhe jo modalitet e operimit ndonëse prodhimi municioneve lidhet me sigurinë kombëtare”, tha Tabaku.
Për këtë arsye, Tabaku pyeti përfaqësuesit e Ministrisë së Mbrojtjes se si do të shiten aksionet dhe si kjo do të jetë në raport me sigurinë kombëtare.
Deputetja e PD-së ngriti dyshimet në lidhje me shifrën e 3 milionë eurove që do jenë në dispozicion për të financuar këtë kompani.
“Ministria foli për një vlerë 3 milionë euro për nisjen e rrugëtimit të kompanisë. Nga sa kam kam marrë informacione, shifra prej 3 milionë eurosh për të operuar në këtë sektor është shumë e vogël ose për të bërë asgjë. Ndërkohë që qeveria ka kontrata koncesionare me vlerë 430 mln euro, ndërkohë që shifra që ju vendosni është shumë e vogël për t’u marrë me këtë çështje. Prandaj kam disa pyetje shtesë edhe për këtë. A mund të kemi informacion se si është përcaktuar vlera 3 milionë euro? Si do të përdoret kjo vlerë 3 milionë euro për të mbuluar kostot e kompanisë?”, tha më tej Tabaku.
/a.r