Komisioni për Çështjet Ligjore dhe Administratën Publike shpalli sërish vakancën për pozicionin e Avokatit të Popullit, duke nxitur debate të forta politike. Vendimi u mor me 8 votat e deputetëve socialistë, ndërsa 5 deputetët e opozitës bojkotuan votimin, duke shprehur mosdakordësinë e tyre me procedurën.
Të interesuarit për këtë post kanë 20 ditë kohë për të depozituar dokumentacionin e nevojshëm si kandidatë.
Kryetari i Komisionit të Ligjeve, Ulsi Manja, mbrojti vendimin duke theksuar se shpallja e re e vakancës është e nevojshme, sepse një pjesë e deputetëve të legjislaturës së kaluar, të cilët kanë firmosur në mbështetje të kandidaturave, sot nuk janë më në Kuvend. Si rrjedhojë, sipas tij, procedura e mëparshme ka humbur vlefshmërinë ligjore.
Nga ana e saj, opozita argumentoi se kjo procedurë është e panevojshme, pasi vakanca është shpallur një herë gjatë legjislaturës së kaluar. Kjo ishte një tentativë e saj për t’i hapur rrugë kandidaturës së propozuar më parë nga Partia Demokratike, Besim Ndregjonit, votimi i të cilit nuk u realizua në seancën e parafundit të legjislaturës së kaluar.
Opozita kërkon që Kuvendi të votojë kandidatin e propozuar prej saj pa hapur një procedurë të re.
Kujtojmë se mandati i Avokates aktuale të Popullit, Erinda Balanca, përfundoi në maj të vitit 2022. Që prej asaj kohe, ajo ka vazhduar detyrën në pritje të pasardhësit. Ky zvarritje më shumë se trevjeçare ka lënë institucionin pa një drejtim të ri, një situatë që vendimi i sotëm synon ta zgjidhë.
Përveç postit të Avokatit të Popullit, Komisioni shpalli gjithashtu me 13 vota edhe vakancën për detyrën e Komisionit për Mbikëqyrjen e Shërbimit Civil.
