Komisioni parlamentar i Ligjeve miratoi të hënën pr/ligjin “Për parandalimin dhe luftimin e infeksioneve e sëmundjeve infektive”, që parashikon marrjen e masave për parandalimin, kontrollin, trajtimin dhe monitorimin e sëmundjeve infektive në vend.
Projektligji përcakton se çdo institucion publik apo jopublik raporton në mënyrë të detyrueshme tek Instituti i Shëndetit Publik për çdo infeksion apo sëmundje të dyshuar apo të konfirmuar, sipas listës së sëmundjeve infektive dhe udhëzuesit përkatës kombëtar të miratuar nga Ministria e Shëndetësisë.
Komisioni gjithashtu vijoi sot shqyrtimin nen për nen të pr/ligjit “Për urdhrin e psikologut në Republikën e Shqipërisë”, ku ishte i pranishëm zv/ministri i Shëndetësisë, Klodian Rjepaj dhe përfaqësues nga Ministria e Mirëqenies Sociale dhe Rinisë.
Komisioni ra dakord që votimi në tërësi i draftit të shtyhej për një seancë tjetër, pas kërkesës së përfaqësuesve të Ministrisë së Mirëqenies Sociale dhe Rinisë, të cilët kërkuan t’i jepet më shumë kohë propozimeve nga grupet e interesit.
