Komisioni për Ekonominë dhe Financat shqyrtoi sot pa praninë e opozitës projektligjin “Për ratifikimin e marrëveshjes sektoriale, ndërmjet Republikës së Shqipërisë, përfaqësuar nga Këshilli i Ministrave i Republikës së Shqipërisë dhe Komisionit Evropian që përcakton dispozitat e menaxhimit dhe zbatimit të asistencës financiare të BE-së për Republikën e Shqipërisë, në kuadër të instrumentit për asistencën e para anëtarësimit në fushën “Bujqësia dhe Zhvillimi Rural” (IPARD)”
Relatorja e këtij projektligji, deputetja Blerina Gjylameti, tha se, objektivi i përgjithshëm i këtij programi për periudhën 2014-2020 është të promovojë/forcojë marrëdhënie të mira fqinjësore dhe zhvillimin socialekonomik të rajoneve kufitare, nëpërmjet vlerësimit të potencialeve të tyre turistike, zhvillimit ekonomik ekologjikisht të qëndrueshëm dhe gjithëpërfshirës, me respektin për trashëgiminë e përbashkët kulturore dhe natyrore.
Anëtarët e Komisionit vijuan më pas me shqyrtimin e projektligjit “Për ratifikimin e marrëveshjes, ndërmjet KM të RSH dhe Qeverisë së Republikës Federale të Gjermanisë, për bashkëpunimin financiar 2013, për projektin “Rezervati Ndërkufitar i Biosferës në Prespë”.
Relatori i kësaj nisme, deputeti Ervin Bushati, tha se, kjo marrëveshje ka si synim investimin e mëtejshëm në Parkun Kombëtar të Prespës, me qëllim përfitimin e popullsisë lokale, ruajtjen e diversitetit, si dhe mbështetjen kryesore për zhvillimin e rezervës biosferë. “Objektivi i projektit është promovimi dhe menaxhimi i integruar i ekosistemeve, duke kontribuar në mënyrë të barabartë për zhvillimin e qëndrueshëm ekologjik dhe ekonomik, si dhe rritjen e bashkëpunimit ndërkufitar në rajon”, tha Bushati.
Komisioni miratoi dhe projektligjin “Për aderimin e Republikës së Shqipërisë në marrëveshjen e financimit ndërmjet qeverisë së Malit të Zi dhe Komisionit Europian për programin e veprimit të bashkëpunimit ndërkufitar Mal i Zi – Shqipëri 2014-2020, alokim i vitit 2014, në kuadër të instrumentit IPA II”.
