Komisioni Parlamentar i Ekonomisë dhe Financave miratoi të hënën nen për nen, paketën fiskale për vitin 2017. Kryetari i Komisionit Erion Braçe, në një prononcim për mediat pas mbledhjes, tha se në paketën fiskale që nis zbatimin nga 1 janari 2017 janë bërë 6 përmirësime, të cilat e bëjnë më të mirë atë.
Për të gjithë invalidët, komisioni miratoi vendosjen e regjimit doganor të përjashtimit për mjetet motorrike që shërbejnë për lëvizjen e tyre. Komisioni vendosi uljen e rentës minerare për të gjithë mineralet që do të përpunohen në vend.
Tjetër ndryshim ishte vendimi për të mbajtur në fuqi skemën aktuale të përjashtimit të sektorit të peshkimit nga akciza. “Kemi mbajtur një premtim për produktet e riciklueshme në vend. Kemi ulur taksën kombëtare mbi mbetjet e grumbulluara brenda vendit nga 50 lekë në 1 lekë për kg, element ky mjaft i rëndësishëm që do të ndihmojë kompanitë brenda vendit”, tha Braçe. Ndërsa ish-ministri i Financave, Ridvan Bode ka kundërshtuar diferencimin e taksës për materialet plastike të riciklueshme.
Taksa doganore për lëndën e parë për industrinë e lehtë është bërë 0. “Këto janë 6 elementë që përmirësojnë paketën fiskale”,deklaroi Braçe, duke shtuar se vitin që vjen nuk kemi asnjë rritje takse./a.m.
