Komisionerja e Bashkimit Evropian për Zgjerim, Marta Kos, ka deklaruar se Kosova nuk mund të avancojë drejt statusit të vendit kandidat për anëtarësim në BE pa normalizimin e marrëdhënieve me Serbinë.
Në një intervistë për Radion Evropa e Lirë, Kos theksoi se kjo është një kërkesë themelore dhe se aktualisht nuk ka sinjale nga shtetet anëtare të BE-së për ndonjë përparim të menjëhershëm në këtë drejtim.
“Jam në kontakt me politikanët në Kosovë dhe ata pretendojnë se janë shumë në favor të normalizimit të marrëdhënieve me Serbinë, çka është parakusht për nisjen e negociatave ose dhënien e statusit të kandidatit,” tha Kos.
Kosova, ende pa status kandidati
Kosova aplikoi për anëtarësim në Bashkimin Evropian më 15 dhjetor 2022 dhe aktualisht mbetet vendi i vetëm në Ballkanin Perëndimor pa statusin e vendit kandidat.
Procesi i anëtarësimit në BE kërkon përmbushjen e kritereve të Kopenhagës, përafrimin e legjislacionit vendor me atë të BE-së dhe ratifikimin unanim nga të gjitha shtetet anëtare.
“Nuk kam marrë asnjë sinjal nga shtetet anëtare ose nga presidenca daneze e Këshillit Evropian se kjo gjë mund të ndodhë së shpejti. Por mendoj se do të ishte shumë mirë të nisim,” shtoi Kos.
Bllokimi i dialogut dhe masat ndëshkuese
Nga shtatori i vitit 2023, nuk është zhvilluar asnjë rund politik i dialogut Kosovë–Serbi në Bruksel, për shkak të tensioneve të vazhdueshme në veri të Kosovës.
Këto tensione bënë që Bashkimi Evropian të vendosë masa ndëshkuese ndaj Kosovës, të cilat ende mbeten në fuqi, pavarësisht kërkesave të qeverisë kosovare për heqjen e tyre.
“Nëse shtetet anëtare do të jenë për heqjen e tyre, sigurisht që do ta bëjmë këtë. Por, për momentin, jo të gjitha shtetet janë për heqjen e masave,” deklaroi Kos.
BE-ja kërkon zbatim të marrëveshjes së vitit 2023
Në vitin 2023, me ndërmjetësimin e BE-së, Kosova dhe Serbia arritën një marrëveshje për rrugën drejt normalizimit të marrëdhënieve. Por sipas Brukselit, asnjëra palë nuk e ka zbatuar plotësisht marrëveshjen, e cila konsiderohet e detyrueshme.
Edhe Shefja e Politikës së Jashtme të BE-së, Kaja Kallas, ka theksuar se as Kosova dhe as Serbia nuk mund të ecin përpara drejt BE-së pa arritur një marrëveshje të qëndrueshme dhe të zbatuar për normalizimin e marrëdhënieve.
