Serbia duhet të arrijë një marrëveshje mbi normalizimin e marrëdhënieve me Kosovën nëse dëshiron t’i bashkohet bllokut, deklaroi të mërkurën në Beograd Komisioneri i BE-së për zgjerimin Johannes Hahn.
“Bashkimi Evropian nuk mundet dhe nuk do të importojë probleme bilaterale. Serbia duhet të mbyllë dhe të zbatojë në mënyrë të pakthyeshme një marrëveshje ligjore me Kosovën para se t’i bashkohet BE-së. Kjo gjithashtu mund të shihet si një mundësi sepse konfliktet e pazgjidhura të kufinjve nuk janë asnjëherë një gjë e mirë për asnjë vend”, tha zyrtari i lartë i BE-së.
Komisioneri Hahn vizitoi Beogradin një ditë pasi Komisioni Europian prezantoi strategjinë e zgjerimit për vendet e Ballkanit Perëndimor që parashikon se Serbia dhe Mali i Zi mund të jenë vendet e para që do t’i bashkohen bllokut në 2025 nëse plotësojnë të gjitha kushtet e nevojshme dhe zbatojnë reformat.
Nga ana e tij Presidenti Serb e vlerësoi strategjinë e BE-së si një mundësi për integrimin e Serbisë ndërsa e përshkroi një marrëveshje me Kosovën si një ‘mal me pengesa’ e cila mund të arrihet vetëm nëse ‘çdokush humbet diçka’.
“Qytetarët e Serbisë duhet të vendosin nëse e shohin të ardhmen e tyre në Europë, për të cilën ju duhet të paguajnë një çmim të shtrenjtë, ose ne mund të vazhdojmë kështu, në bisht të Evropës”, deklaroi lideri serb.
