Kryetari i Partisë së Lirisë, Ilir Meta ka reaguar për ngjarjen e rëndë që u regjistrua pasditen e sotme ku efektivi i policisë, Arjan Tase përplasi për vdekje me gomone një 7-vjeçare që po notonte në det.
Me anë të një postimi në Facebook, Meta shkruan se dënon situatën katastrofike të sigurisë në plazhe.
Meta kërkon hetim të menjëhershëm lidhur me ngjarjen dhe ndëshkim të ashpër për autorin.
Postimi i Ilir Metës:
Thellësisht i tronditur nga ngjarja tragjike në plazhin e Himarës, ku zyrtari i lartë i Policisë së Elbasanit A.T i mori sot jetën një vajze të mitur 7-vjeçare, e cila kishte ardhur me familjen për pushime në Shqipëri.
Duke ju shprehur ngushëllimet më të ndjera familjes dhe të afërmve për humbjen e vogëlushes së tyre të shtrenjtë, dënoj me forcën më të madhe situatën katastrofike të sigurisë publike në plazhe, në pikun e sezonit turistik, fatkeqësisht me pasoja kaq tragjike të përsëritura.
Hetim i menjëhershëm i thelluar dhe ndëshkim të ashpër për shkeljen e ligjit nga drejtuesit e Policisë së Shtetit! Mjaft arrogancës dhe papërgjegjshmërisë në Policinë e Shtetit!
