Shqipëria e minifutbollit eliminohet nga Botërori 2023 në Essen të Gjermanisë. Kuqezinjtë u mposhtën 3-1 nga Ukraina në fazën 1/16.
Pasi shkroi historinë duke u kualifikuar për herë të parë në një event madhor dhe kualifikimit nga faza e grupe, përfaqësuesja nuk arriti të realizonte mrekullinë përballë një prej favoriteve të turneut.
Andrey, S. Denys dhe K. Denys realizuan golat e suksesit të ukrainasve. Goli i Kaças që shkurtoi përkohësisht shifrat në 2-1 nuk i mjaftoi Shqipërisë. Ndeshja u mbyll mes polemikave, sepse në sekondat e fundit kur kuqezinjtë u hodhën në kërkim të barazimit, lojtarët pretenduan faull në mesfushë, por gjyqtarët vazhduan lojën duke favorizuar golin e tretë të Ukrainës.
Kjo nxiti protestat e lojtarëve kuqezi, që nuk arritën të kualifikohen mes 16 më të mirave në botë. Gjithsesi Shqipëria kthehet në shtëpi mes duartrokitjeve dhe brohoritjeve të tifozëve, të cilët e mbështeten në numër të lartë gjatë gjithë botërorit.
/a.r
