Sipas autoriteteve kolumbiane, forcat e sigurisë bastisën të shtunën laboratorin që ndodhej pranë një lumi në afërsi të Paqësorit. Laboratori ishte i ndarë në tetë seksione, ku punëtorët prodhonin mesatarisht katër tonë kokainë çdo tremujor.

Më pas, lënda narkotike paketohej dhe ngarkohej në nëndetëse ose varka të shpejta për t’u dërguar në Amerikën Qendrore, ku vijonte rrugëtimin drejt Meksikës, me Shtetet e Bashkuara si destinacion përfundimtar.

Ushtria zbuloi në vend edhe 2 tonë kokainë, me vlerë 10,8 milionë dollarë, që ishte bërë gati për t’u nisur. Ushtarët gjetën edhe 904 kilogramë pastë kokaine, që përftohej nga gjethet e kokës, marijuanë, armë të ndryshme dhe 3 varka.

Sipas ushtrisë, laboratori u gjet pasi patrulla e zonës po ndiqte një grup të armatosur që kishte qëlluar në drejtim të saj. Në pranga përfunduan pesë pjesëtarë të kartelit të Bllokut Perëndimor, të drejtuar nga Alfonso Cano, ndërsa një tjetër u vra nga ushtarët.