Kapja e 613 kg kokainë në portin e Durrësit ka patur jehonë edhe në mediat e Brukselit që e konsiderojnë këtë aksion, tregues të progresit që Shqipëria ka bërë në luftën kundër krimit.
Ky progres sipas “EUreporter”, është çelësi për fillimin e negociatave të anëtarësimit të Shqipërisë në BE.
Eureporter thekson faktin që qeveria shqiptare ka miratuar një paketë reformash, përfshirë edhe masat kundër krimeve të rënda, duke plotësuar kështu një kusht kryesor të Bashkimit Europian, për të filluar negociatat e pranimit.
Në mbështetje të kësaj teze, në artikull citohet Presidenti i Komisionit Europian Jean-Claude Juncker i cili vlerësoi së fundmi qeverinë shqiptare për progresin e madh në luftën kundër krimit të organizuar, duke shtuar se progresi mbresëlënës do të bindë Komisionin Evropian që të rekomandojë hapjen e bisedimeve të pranimit.
Shkrimi i plotë:
“Bashkimi Europian ka përshëndetur përpjekjet e Shqipërisë në luftën kundër krimit të organizuar, një parakusht ky për anëtarësimin e saj të mundshëm në bllokun 28 vjeçar”- shkruan Martin Banks.
Autoritetet thonë se sekuestrimi këtë javë i sasisë më të madhe të kokainës, të gjetur ndonjëherë në Shqipëri, me një vlerë të parashikuar prej 180 milion euro, është një shembull i përparimit në trajtimin e problemit.
Shteti ish-komunist i Ballkanit është nën “presionin” perëndimor për të rritur luftën kundër trafikimit të drogës dhe formave të tjera të krimit të organizuar, si pjesë e përpjekjes së saj për t’u bashkuar me Bashkimin Europian.
Pozicionuar në udhëkryq midis Europës lindore dhe perëndimore, Shqipëria ka qenë një vend burim për marihuanën, si dhe një rrugë tranziti për kokainën dhe heroinën drejt tregjeve europiane.
Partia që qeveris në Shqipëri, megjithatë, ka miratuar një paketë reformash, përfshirë trajtimin e krimit të rëndë, i cili plotëson një kusht kyç të Bashkimit Evropian për të filluar negociatat e pranimit.
Të mërkurën, policia shqiptare kapi në Durrës 613 kilogramë kokainë, të mbështjellë në 528 paketa, të gjetura nën dyshemenë e një kamioni të ngarkuar me banane, që mbërriti nga Kolumbia.
Ngarkesa me banane dhe kokainë kaloi nga Italia dhe Malta në Shqipëri.
Ngarkesa është kapur dhe janë bërë dy arrestime. Operacioni i suksesshëm është kryer pavarësisht mungesës së ndonjë sinjali nga vendet europiane ku ngarkesa kaloi përpara se të arrinte në portin e Durrësit.
Autoritetet shqiptare thonë se “ndërveprimi i menjëhershëm dhe efektiv midis policisë dhe prokurorit të krimeve të rënda siguroi përfundimin e suksesshëm të operacionit”.
Në të kaluarën, rritja e krimit të organizuar në vendin e vogël juglindor me bregdetin e tij të gjerë përgjatë Adriatikut, shihej si një pengesë për kredencialet e anëtarësimit në BE.
Shqipëria është një vend që tashmë përballet me shumë sfida të brendshme, por raportuesi i Parlamentit Europian për dosjen e Shqipërisë, eurodeputeti gjerman socialist Knut Fleckenstein, ka lavdëruar përpjekjet e saj në luftën krimeve të rënda.
Ai tha se : “Që nga vera e vitit 2014 Shqipëria ka qenë një kandidate për anëtarësim në BE dhe që atëherë ajo ka bërë progres të vazhdueshëm”.
Ai tha se miratimi i reformave të mëdha kishte qenë një “hap i rëndësishëm në rrugën e Shqipërisë drejt anëtarësimit në BE, duke u bërë kështu një vend modern.
“Më pak korrupsion, më pak krime të organizuara, janë vendimtare për jetën e përditshme në Shqipëri,” tha ai.
Komisioneri i Zgjerimit të BE Johannes Hahn gjithashtu shprehu optimizëm rreth procesit të reformës, duke thënë se Komisioni do të rekomandojë së shpejti, ndoshta deri në verë, fillimin e negociatave të pranimit të Shqipërisë nga vendet anëtare.
Hahn tha se Shqipëria kishte bërë “reforma të rëndësishme” dhe ishte “e kualifikuar për këtë hap”.
Pas vizitës në Tiranë të dielën (25 shkurt), Presidenti i Komisionit Europian Jean-Claude Juncker vlerësoi qeverinë shqiptare për progresin e madh në përpjekjet reformuese drejt integrimit europian.
Juncker tha: “Shqipëria nuk pushon së grumbulluari progres pasi ka filluar shumë reforma strukturore, në shumë fusha. Progresi është mbresëlënës dhe do të bindë Komisionin Evropian që të rekomandojë hapjen e bisedimeve të anëtarësimit. “
Komentet e mëtejshme erdhën nga Luka Coffey, drejtor i Qendrës së Politikës së Jashtme në Fondacionin Heritage, i cili tha: “Shqipëria ka shumë për t’u krenuar. Vendi u bë anëtar i plotë i NATO-s në vitin 2008, duke u bërë vetëm kombi i dytë me shumicë myslimane në aleancë. Në vitin 2014 u bë një kandidat zyrtar për t’u bashkuar me BE. Për një vend që ndodhet në rajonin e turbullt, në depresion ekonomik dhe në rajonin e Ballkanit të shkatërruar nga lufta, këto nuk janë një zhvillim i keq “.
Deputetët europianë gjithashtu kanë mirëpritur përparimin e Shqipërisë në reformat lidhur me BE dhe përparimin në luftën kundër krimit të organizuar, duke thënë se kjo mund të jetë një “çelës” për avancimin e procesit të pranimit në BE dhe fillimin e negociatave.
