E përditshmja nga Prishtina Koha Ditore në numrin e saj të sotëm shkruan që Presidenti i Kosvës Hashim Thaçi është denoncuar në Gjykatën Speciale.Gazeta e cila thirret në burimet e saj shkruan për atë sesi ka nisur e tëra.
“Data e largët 6 prill 2000 shënon komunikimin e fundit që autoritetet e drejtësisë së Kosovës kanë zhvilluar ndërmjet vete përkitazi me vrasjen e aktivistit të LDK-së nga Skenderaj, Haki Imeri.
Familja e të ndjerit tash i është drejtuar Hagës nëpërmjet një shkrese, me të cilën është denoncuar edhe presidenti Hashim Thaçi.
Më 2 nëntor të vitit 1999, Haki Imeri ishte duke ecur prej shkollës në fshatin Vojnik, ku ai ishte mësues, në drejtim të shtëpisë së tij, në fshatin Turiqevc, kur ai është marrë nga tre persona që dyshohet të kenë qenë policë të UÇK-së. Një mik i Haki Imerit ishte duke ecur me të.
Ai pati deklaruar se të tre burrat i kishin thënë Imerit se duhej të shkonte me ta, për t’iu përgjigjur disa pyetjeve.
E kishin futur në një veturë dhe ishin larguar nga zona. Rreth orës 19:00, familja e Imerit është informuar se ishte gjetur i vrarë”, shkruan kjo Gazetë e cila mëpas jep edhe lajmin për atë që Thaçi është denoncuar në Speciale për këtë rast, citohet ”Gazeta Blic”. (b.an)
