Ndryshimet në Kodin Penal sjellin ashpërsim të masave edhe për ilaçet e falsifikuara të cilat konsiderohen si të rrezikshme për jetën dhe shëndetin. Me shtesat e bëra në nenin 284 të Kodit Penal parashikohet që: “Prodhimi, mbajtja për qëllime tregtimi, shitja apo ofrimi për shitje, furnizimi, shpërndarja, eksportimi, importimi i barnave, substancave aktive ose lëndëve ndihmëse për prodhimin e tyre, si dhe produkteve e pajisjeve mjekësore, aksesorëve, pjesëve përbërëse apo materialeve të tyre të falsifikuara ose të dëmshme për jetën dhe shëndetin dënohen me burgim nga gjashtë muaj deri në pesë vjet.
Kur kjo vepër kryhet gjatë ushtrimit të një veprimtarie profesionale, nëpërmjet internetit, në bashkëpunim apo më shumë se një herë, dënohet me burgim nga tre deri në shtatë vjet. E njëjta vepër kur ka sjellë pasoja të rënda në jetën apo shëndetin dënohet me burgim jo më pak se dhjetë vjet”. Një tjetër shtesë është ajo në nenin 288 që parashikon se falsifikimi, tregtimi ose hedhja për konsum e nënprodukteve të falsifikuara të naftës që përdoren si lëndë djegëse dënohet me burgim deri në pesë vjet. Po kjo vepër, kur kryhet në bashkëpunim, më shumë se një herë ose ka sjellë pasoja të rënda materiale për shëndetin apo ka prishur ekosistemin, dënohet me burgim nga tre deri në dhjetë vjet. Këto ndryshime ligjore u votuan dje në Komisionin e Ligjeve me konsensusin e mazhorancës dhe të opozitës.
SHEKULLI
