Tre ministra të qeverisë Rama, ai i Brendshëm Tahiri, i Transporteve Haxhinasto dhe ajo e Arsimit Nikolla dolën në një konferencë të përbashkët për mediat pak ditë para hyrjes në fuqir të ndryshimeve në Kodin Rrugor.
Këto ndryshime të miratuara nga parlamenti me shumicë të cilësuar parashikojnë rregulla më strikte për sigurinë rrugore, veçanërisht për transportin e nxënësve dhe fëmijëve në tërësi.
Ministri i Brendshëm, Saimir Tahiri theksoi rëndësinë e bashkëpunimit nga të gjithë për ti bërë rrugët më të sigurta. Ai thase masat që do të aplikohen nga fillimi i vitit tjetër.
“Kemi sjellë një mendje tjetër në kuadër të sigurisë rrugore dhe garantimit të rregullave të cilat shpëtojnë jetë dhe i japin një tjetër çmim jetës së qytetarëve të cilët përdorin rrugën qoftë si pasagjerë apo përdorues të mjeteve të tjera. Fakt mbetet që bilanci i aksidenteve në rrugë është shqetësues. Kërkohet bashkëpunim nga të gjithë për ti bërë rrugët tona më të sigurta. Nuk mjafton ligji, aktet, masat e policisë apo Autoritetit Rrugor, nuk mjaftojnë masat represive kur vjen puna tek bashkëpunimi dhe sensibilizimi i qytetarëve për ti bërë rrugët tona më të sigurta. Gjysma e jetëve të humbura në rrugët shqiptare janë si pasojë shkeljes së rregullave të qarkullimit rrugor, shpesh një mjet me një këmbësor. Trashëgojmë një situatë ku çdo institucion arsimor përdor mjete pothuajse të rastit për transportin e nxënësve. Ky është një investim që garanton mirëqenien e familjeve shqiptare dhe mbi të gjitha të ardhmen e fëmijëve. Ky është investimi më i mirë që mund të bëjmë për sot dhe për nesër. Ju uroj të gjithëve gëzuar vitin e ri, vitin tjetër fillon aplikimi i këtyre masave.” tha Tahiri.
HAXHINASTO
Ministri Haxhinasto tha se paketa e re të masave të transportin rrugor ka pasur efekte për sigurinë rrugore.
Ai apeloi që drejtuesit ti referohen Kodit Rrugor të Shqipërisë për sa i përket transportit të fëmijëve.
“I bëj thirre drejtuesve të mjeteve në rastet e transportit të fëmijëve, kur fëmijët janë në automjet, t’i kenë parasysh kërkesat që ka Kodi Rrugor i Shqipërisë. Të jenë shumë të kujdesshëm gjatë drejtimit, të mos e drejtojnë nën efektin e alkoolit, të mos kemi asnjë aksident në rrugët tona”, tha ai.
NIKOLLA
Ministrja e Arsimit, Lindita Nikolla tha se ky është vetëm akti i parë që lidhet me sigurinë e transportit të fëmijëve.
Ministrja përfitoi nga rasti për tu uruar fëmijëve nxënësve dhe prindërve shqiptarë një vit të ri të gëzuar dhe një fillimviti të mbarë në të gjitha aspektet e veprimtarisë së tyre.
