Ministrja e Mbrojtjes, Mimi Kodheli, priti sot homologen e saj gjeorgjiane, Tinatin Khidasheli, e cila në krye të një delegacioni të lartë ndodhet në Tiranë për një vizitë zyrtare.
Pas këtij takimi ministrja e Mbrojtjes Kodheli dhe ministrja e Mbrojtjes së Gjerogjisë Khidasheli nënshkruam Memorandumin e Mirëkuptimit në fushën e mbrojtjes ndërmjet ministrive të mbrojtjes së dy vendeve tona.
Kodheli tha se i ka shprehur ministres gjeorgjiane vlerësimin për kontributin që Gjeorgjia jep si vend kandidat për anëtarësim të plotë në NATO. “Kontribut që përkthehet në reforma të guximshme dhe pjesëmarrje aktive me trupa në operacionet e NATO-s. Konfirmoj se Shqipëria ka mbështetur dhe do të mbështesë Gjeorgjinë në rrugën e saj të integrimit euro-atlantik. Gjithashtu, gjatë takimit, pata mundësinë t’i rikonfirmoj qëndrimin e qeverisë shqiptare, e cila ka kundërshtuar në vijimësi njohjen nga ana e Rusisë dhe disa vendeve të tjera të “pavarësisë” së vetëshpallur të Osetisë së Jugut dhe Abkazisë. Kjo është shkelje e hapur e sovranitetit të Gjeorgjisë”, – është shprehur ministrja Kodheli.
Çështja e njohjes së Kosovës ishte një tjetër temë në të cilën janë ndalur dy ministret. “Ftova zonjën Khidasheli të bëhet një zë më shumë në diplomacinë e vendit të saj pro Kosovës. Rikonsiderimi i qëndrimit të Gjeorgjisë për njohjen e pavarësisë së Kosovës do të ishte një lajm i mirë për të gjithë ne”, – theksoi Ministrja Kodheli.
BW
