Këtë të dielë, më 5 tetor, ministrja e Punëve të Brendshme, Albana Koçiu ka shkuar në Vlorë, aty ku vazhdon puna e pandërprerë për lirimin e hapësirave publike, të përdorura prej vitesh si pika grumbullimi për mjetet e sekuestruara apo të konfiskuara. Ajo njoftoi se pas Shkodrës dhe Laçit, ka nisur puna për lirimin e një tjetër hapësire publike, në qytetin bregdetar.
Koçiu ishte e shoqëruar nga ministri i Mbrojtjes Pirro Vengu, kryeinspektorja e AAPSK-së Risena Xhaja, nënkryetari i Bashkisë Vlorë dhe drejtori vendor i Policisë.
“Jemi në zonën e Nartës, është një nga 24 pikat e bllokimit në të gjithë vendin që Policia e Shtetit përdor për të gjithë automjetet e konfiskuara dhe të sekuestruara. Në fakt, që prej fillimit të muajit shtator, së bashku me AAPSK, kemi nisur një fushatë mbarëkombëtare për të pastruar të gjitha këto pika, të cilat zënë një sipërfaqe të konsiderueshme në të gjithë territorin e vendit, për t’i sistemuar, për të seleksionuar të gjitha ato mjete, që aktualisht kanë prej vitesh të depozituara. Siç mund ta shikoni, janë plotësisht jashtë funksionit”, u shpreh Koçiu.
Koçiu: Do t’i pastrojmë dhe kthejmë në kënde lojërash për fëmijë!
Pikat e bllokimit të përdorura nga Policia e Shtetit janë sipërfaqe të konsiderueshme që shpesh herë krijojnë edhe problematika për komunitetet duke u kthyer edhe në zona të pasigurta. Por ministrja Koçiu tha se ato do kthehen në hapësira që do përdoren nga pushteti vendos për interes publik.
“Në vijim të këtij aksioni të pastrimit të sipërfaqeve, ajo që jemi duke bërë është t’i shndërrojmë këto zona, në zona jo vetëm të pastra, por edhe në zona që fare mirë mund t’i përdorë pushteti vendor për të hartuar plane zhvillimi e për t’i kthyer komuniteteve në zona, kënde lojërash apo argëtimi për fëmijët por edhe për t’u përdorur nga institucionet publike, për qëllime apo interes publik”, tha Koçiu.
Ndërkohë kryeinspektorja Xhaja informoi se qarku i Vlorës ka tetë pika grumbullimi të mjeteve.
“Kjo është pika e përqendruar, më e madhe. Pesë pika janë në Sarandë, një në Delvinë, një në Himarë dhe kjo është në Vlorë dhe është një ndër pikat më të mëdha në rang vendi. Nga evidentimi që ka bërë DVP Vlorë, janë 2 mijë e 124 mjete e motomjete, të sekuestruara e të konfiskuara, njëkohësisht edhe prova materiale, nga të cilat 1 mijë e 400 shkojnë për skrap, pra lirohet pothuaj 80% e sipërfaqes. Pjesa tjetër janë të konfiskuara e do vlerësohet për t’iu kaluar institucioneve dhe ato që janë prova materiale, jemi në kontakt me Prokurorinë e Përgjithshme, të mbyllen si çështje dhe t’u japim një drejtim edhe atyre”, tha Xhaja.
Vengu: Narta po pastrohet nga mbetjet e rrezikshme
Vengu deklaroi se ndërhyrja për pastrimin e zonës në Nartë është tepër e rëndësishme, për shkak të afërsisë me zonat e banuara, destinacionet turistike dhe korridoret e rëndësishme të transportit, përfshirë projektin e ri të hekurudhës që do të lidhë Vlorën me aeroportin.
Sipas ministrit, në bashkëpunim me bashkinë, është vendosur që një pjesë e hapësirës të rikuperohet për përdorim të sigurt dhe funksional nga komuniteti.
“Është shumë e rëndësishme sidomos për një pikë si kjo në Nartë, shumë pranë komunitetit të banorëve dhe shumë pranë zonave turistike dhe pranë një aksi transporti që do të rehabilitohet dhe ka të bëjë me projektin e hekurudhës se re dhe ndërlidhjes së Vlorës me aeroportin. Duke pastruar zonën nga kjo situatë e ngarkuar prej disa dekadash, ne fillojmë rehabilitimin, duke biseduar edhe me kryetarin, nevoja ishte emergjente që për një pjesë, bashkia të mund ta rikuperonte hapësirën dhe sipërfaqen në zonat e banuara. Nga ana tjetër të fillonte një përdorim normal duke ditur që siguria patjetër që cenohet në këto zona, edhe mjedisi, pa dyshim, sepse kemi të bëjmë me materiale që rrinë e degradohen, sidomos me një zonë të pyllëzuar siç është këtu. Do të kemi një periudhë disamujore ku mund të fillojmë evadimin progresiv, besoj se keni një plan se si do të ecë kjo”, pohoi Ministri Vengu.
Rreth 5 muaj është përllogaritur procesi i largimit të mjeteve.
