Kryetari i PS-së së Fierit, Petro Koçi i është kundërpërgjigjur akuzave të rivalit demokrat Luan Baçi në lidhje me punësimet dhe tenderimet në qytetin e Fierit. Baçi edhe pse ishte pro apelit të lëshuar nga Koçi që SPAK të hetojë mbi prokurimet publike, deklaroi në emisionin “Breaking” në Top News se Koçi nuk ishte i sinqertë, pasi situatën në Fier e dinte prej kohësh dhe se kjo lëvizie bëhej për shkak të luftës brenda llojit në PS.
Koçi me anë të një statusi në rrjetet sociale shkruan se Baçi nuk mund të devijojë qëndrimet e tij në luftën kundër korrupsionit dhe ta kanalizojë si luftë e brendshme brenda PS-së.
“Qëndrimet tona kundër së keqes nuk i komplekson dhe nuk i kompromenton dot as Tosun Baçi e as plaku Mere. Opozita është shumë hapa mbrapa. Opozita s’ka takat të shkulë dot regjimin Berisha në PD e jo më të luftojë sëmundjet shoqërore dhe politike të kohës”, shkruan Koçi.
Më tej ai thekson se “Taktika për te krijuar perceptimin se lufta ndaj korrupsionit dhe krimit është lufte e brendshme në PS është dritëshkurtër. Kjo është një çështje mbarëshoqërore dhe institucionale”.
/m.j
