Këshilli i Lartë i Prokurorisë është mbledhur sot në orën 10:00 për të nisur shqyrtimin e dokumentacionit të katër kandidatëve që kanë shfaqur interes për të drejtuar Prokurorinë e Posaçme (SPAK).
Në garë janë Adnan Xholi, Klodian Braho, Doloreza Musabelliu dhe Ervin Gogaj – të gjithë prokurorë aktualë të SPAK me karrierë të gjatë në sistemin e drejtësisë dhe të angazhuar në çështje me ndjeshmëri të lartë.
Pas verifikimit të kushteve ligjore dhe dokumentacionit, kandidatët do të ftohen për t’u intervistuar publikisht nga KLP.
Gjatë këtij procesi të hapur, do të vlerësohen përvoja profesionale, integriteti, vizioni dhe aftësia për të drejtuar një institucion që ndodhet nën vëmendjen më të lartë publike.
Ky proces vjen në prag të përfundimit të mandatit 3-vjeçar të Altin Dumanit më 18 dhjetor, i cili ka drejtuar SPAK-un gjatë një periudhe me hetime të rëndësishme ndaj figurave të larta politike dhe grupeve kriminale në vend.
Në fillim të mbledhjes, fjalën e mori anëtari Zeqir Hoda, i cili tha se për shkak të procedurave i duhej kohë që të shqyrtonte aktet ligjore nëse gjithçka ishte konform rregullave, para se të votonte.
Zeqir Hoda, anëtar:
“Sikurse është përgjegjësia ligjore dhe kushtetuese e këtij institucioni, për të marrë të dhënat e nevojshme, vlerësoj që duhet të largohem nga votimi i seancës për këtë çështje. Po qëndroj, meqë procedura nuk është hapur ende.”
Vatë Staka, anëtar:
“Zoti Hoda paraqiti një njoftim mediatik. Disa media kanë botuar para tre ditësh që një nga kandidatët që ka aplikuar për kreun e SPAK… Nuk jam në gjendje të them nëse është në konflikt interesi apo jo, por do ta gjykojmë në një seancë të posaçme.”
Sokol Stojani, anëtar:
“Këshilli, me vendimin nr. 318 të vitit 2022, ka emëruar në pozicionin e drejtuesit të Prokurorisë së Posaçme kundër Korrupsionit dhe Krimit të Organizuar, prokurorin Altin Dumani për një mandat trevjeçar. Duke qenë se mandati i drejtuesit aktual mbaron më 18 dhjetor 2025, Këshilli, brenda afateve ligjore, mendoi se duhej të niste procedura për zgjedhjen e drejtuesit të ri të kësaj prokurorie.Më datë 17.09 është publikuar thirrja për konkurrim për pozicionin drejtues të Prokurorisë së Posaçme, të parashikuar në nenin 148/dh pika 3 të Kushtetutës, nenet 52 pika 5, 7 dhe 8 të ligjit nr. 96/2016, etj., për të gjithë prokurorët e kësaj strukture që plotësojnë kriteret ligjore për pozicionin e drejtuesit, për të aplikuar deri më datë 08.10.2025. Në përmbyllje të këtij afati, rezulton se kanë aplikuar katër kandidatë në garë, të cilët sipas tij plotësojnë kushtet. Aplikantët duhet të jenë prokurorë të SPAK dhe të mos jenë drejtues. Po ashtu, një tjetër kusht është fakti që kandidatët duhet të kenë paraqitur platformë dhe të mos kenë masë disiplinore. Ne i propozojmë Këshillit miratimin e listës së kandidatëve që plotësojnë kushtet paraprake për kandidim për vendin e drejtuesit të SPAK,” tha ai.
