Ministri i Turizmit dhe Mjedisit, Blendi Klosi, u shpreh të premten se, është e vështirë të flasësh për shifra konkrete të dëmeve në turizëm, nga situata e COVID-19.
Deklarata erdhi në studion e emisionit “Java në RTSH” ku Klosi theksoi se turizmi nuk është problematikë e momentit, por e gjithë sezonit që do të vijë gjatë vitit.
Megjithatë ministri shtoi se janë një sërë institucionesh që po punojnë për atë çfarë do të ndodhë pasi pandemia të përfundojë. Ai shtoi se ekspertët do t’i paraqesin qeverisë një plan tjetër të ndihmës për sektorin e turizmit.
“Koronavirusi e frenoi turizmin sezonal. Kjo situatë e krijuar nga pandemia globale ishte goditja e dytë në pak kohë për këtë sektor, pas tërmetit. Gjithësesi unë besoj se normaliteti do të kthehet gradualisht” – tha Klosi.
Ai u tregua optimist teksa e cilësoi turizmin si një sektor që do ta kurojë ekonominë.
“Turizmi nuk do të jetë “Pacienti 0” i ekonomisë shqiptare. Turizmi do të jetë doktori, që do qetësojë dhe do rimëkëmbë dhe sektorët e tjerë të ekonomisē shqiptare.
Bazuar në dy karakteristika të tij: në 85 % lëvizja turistike është nga toka dhe 35 % e volumit turistik është turizmi i shqiptarëve të trevave. Jemi optimistë për rimëkëmbjen e shpejt.
Pandemia përveç të tjerave, po sjell domosdoshmërinë që edhe në sektorë si turizmi dhe mjedisi të hartohen politika të reja, strategji që jemi duke i konkluduar edhe në përputhje me masat e partnerëve ndërkombëtarë.
Ligji i turizmit blu, u miratua së fundmi nga qeveria, ndërkohë për mjedisin vendimi për heqjen e qeseve plastike, mund të shtyhet, por do të zbatohet. Turizmi i natyrës është trendi i ri botëror dhe ne kemi avantazhin e një natyre të padëmtuar. Le ta kthejmë në dobi të turizmit” – tha Blendi Klosi në studion e emisionit “Java në RTSH”.
