Ministri i Mirëqenies Sociale dhe Rinisë, z. Blendi Klosi, ka inspektuar sot në terren punën që po kryhet për të zgjidhur situatën e krijuar me diagnostikimin dhe komisionimin e ndihmës ekonomike për personat me aftësi të kufizuara në qytetin e Fierit. Ai ka qenë i pranishëm në Poliklinikën e këtij qyteti, ku janë ngritur dhe po funksionojnë grupe të posaçme pune me mjekë dhe punonjës të shërbimit të ardhur nga Tirana, për t’i dhënë zgjidhje situatës së krijuar brenda kësaj jave.
Pasi është interesuar në lidhje me punën e zhvilluar deri më tani dhe vështirësitë e hasura në menaxhimin e kësaj situate, ministri Klosi ka siguruar për mediat vullnetin e plotë të MMSR-së për t’i dhënë një zgjidhje të shpejtë situatës së krijuar, në mënyrë që të gjithë personat me aftësi të kufizuara të mund të marrin atë që u takon sipas ligjit. “Shikojmë që situata është e rënduar, por mjekët e ardhur nga Tirana po e ndjekin me shumë përparësi dhe në ditën e djeshme dhe në ditën e sotme situata ka marrë zgjidhje. Shumë shpejt do mbarojë faza e parë e njerëzve që kërkojnë ndihmën ekonomike nga shteti”, – tha ministri Klosi duke folur për mediat lokale nga qyteti i Fierit.
Klosi ka evidentuar gjithashtu se ndër problemet që janë evidentuar në këtë qytet kanë qenë ato që kanë të bëjnë me rivlerësimin e dosjeve dhe menaxhimin e stafeve përkatëse. “Këto janë disa veprime emergjente për të kuptuar që kush e meriton, ta marrë ndihmën në masën maksimale, por edhe abuzuesit të dalin nga skema e ndihmës ekonomike”, – u shpreh ministri.
Por ministri Klosi ka theksuar se për zgjidhjen e emergjencës së krijuar në qytetin e Fierit, MMSR do të punojë për të riparë të gjitha kriteret e përfitimit të KEMP-it. “Ajo që ndjejmë edhe nga takimi në terren me këtë grup njerëzish kuptohet që nuk ka vetëm probleme administrative, por ka ardhur koha që shumë shpejt të rishikohen të gjitha kriteret e njerëzve që përfitojnë këtë ndihmë nga shteti shqiptar dhe për këtë arsye, brenda muajit ne do të mbyllim rivlerësimin e kritereve që përcaktojnë KEMP-in dhe po ashtu do duhet të rishikohet e gjithë skema e mënyrës së vlerësimit”, – shtoi ministri Klosi.
Gjithashtu, ai ka deklaruar se një ndërhyrje tjetër e nevojshme në këtë drejtim është edhe informatizimi i të gjitha të dhënave dhe personave që përfitojnë ndihmë ekonomike si individë me aftësi të kufizuara. “Një nga prioritetet e punës së institucionit përkatës do të jetë krijimi i bazës së të dhënave për këta pacientë”, – tha z. Klosi.
Me urdhër të Kryeministrit, për të kompletuar numrin e pamjaftueshëm të mjekëve të cilët kryenin këtë proces deri më sot, prej ditës së djeshme janë shtuar 12 mjekë të specialiteteve dhe 3 punonjës të shërbimit social shtetëror, të cilët po punojnë në mënyrë të pandërprerë për një periudhë 1-javore nga data 8 qershor deri më datë 15 qershor 2015, për të zgjidhur situatën në Qarkun e Fierit. Po ashtu, me vendim të Këshillit të Ministrave, për t’i dhënë një zgjidhje afatgjatë situatës së personave me aftësi të kufizuara në shkallë vendi, që përballen me afate të tejzgjatura të pritjes për t’u ankimuar e rivlerësuar në KEMPE Eprore, do të krijohen edhe 3 KEMP-e Eprore shtesë.
