Klopp thotë se ndeshja Liverpool – Man City do të kujtohet edhe pas 20 viteve, për shkak të tempos së saj përgjatë 90 minutave.Liverpool i dha fund ecurisë pa humbje prej 22 ndeshjeve në Premierligë të Manchester City me Firmino, Mane dhe Salah që shënuan brenda 10 minutave gjatë pjesës së dytë, teksa golin tjetër e realizoi Chamberlain. Për Cityn shënuan Sane, Gundogan dhe Silva.
Jurgen Klopp është bërë trajneri i vetëm që ka arritur të mundë plot 5 herë Pep Guardiolan, si askush tjetër, dhe pas ndeshjes gjermani ka thurur elozhe për paraqitjen e të dyja skuadrave.“Wow! Çfarë ndeshje! Dy skuadra që luanin me këmbën në gaz për 90 minuta”, u shpreh Klopp.
“Ishte një ndeshje historike e cila do të flitet edhe pas 20 viteve pasi dukej sikur City nuk do të humbiste asnjëherë këtë sezon”, shtoi ai.
“Njerëzit rreth e qark botës e kanë parë këtë ndeshje dhe arsyeja është sepse të dyja skuadrat luajtën me zemër deri në fund”.
“I shkaktuam shumë probleme. Nuk kisha frikë në fund. Nëse mikson mentalitetin me cilësinë, kjo ndeshje është rezultati. Normalisht do të ketë edhe nga ata që do të ankohen për mbrojtjen, por nuk më interesojnë”, theksoi mes tjerash Klopp, përgatiti ”Gazeta Express”. (b.an)
