Klea Huta, prezantuesja për të dytin vit e spektaklit të talenteve “Gjeniu i vogël”, ka fituar aq shumë shumë zemrën e vëllezërve Pandi dhe Bledi Laço, të cilët i kanë ofruar edhe projektin e tyre të verës.
Ajo po prezanton spektaklin “Maratona e këngës popullore qytetare”, që ka nisur turin e koncerteve në disa prej qyteteve kryesore të Shqipërisë, duke u rikthyer përsëri pas një kohe të gjatë mos transmetimi. I karakterizuar nga motivet tradicionale shqiptare, ky spektakël nis menjëherë pas përfundimit të Kampionatit Europian, në drejtimin e Kleas. Producentët e spektaklit kanë menduar që Klea të jetë e vetme në skenë, duke ia besuar asaj të gjithë drejtimin e spektaklit, ndryshe nga vitet më parë, që prezantimin e bënte dyshja klasike Drini Zeqo dhe Anjeza Maja.
Spektakli që transmetohet në ‘Tv Klan’, sjell këngët më të bukura popullore në këtë udhëtim nëpër qytetet më kryesore të Shqipërisë. Klea ndryshon kështu reghistër në mënyrën e prezantimit, pasi nga një spektakël për fëmijë, ajo do të përshtatet me këtë format që pëlqehet kryesisht nga moshat e rritura. Klea do të ketë mundësinë të shijojë disa nga qytetet bregdetare të populluara nga turistët. Edhe këtë verë ajo shquhet për linjat, pas një periudhe trajtimesh në qendra estetike dhe ushtrimeve në palestër. /Panorama Plus
