Ministrja e Integrimit Europian, znj.Klajda Gjosha, zhvilloi gjatë vizitës së saj zyrtare në Danimarkë, një takim me Zv. Sekretarin e Shtetit në Kryeministrinë daneze, z. Michael Starbaeck Christensen.
Gjatë këtij takimi bashkëbiseduesit u ndalën tek bashkëpunimi rajonal, procesi i Berlinit si një qasje e re që nxit integrimin dhe zhvillimin e mëtejshëm të të gjitha vendeve të Ballkanit Perëndimor.
Ministrja Gjosha u shpreh se Shqipëria është e vendosur për intensifikimin e mëtejshëm të këtij bashkëpunimi, duke theksuar rëndësinë e madhe që ai ka për axhendën europiane. Ministrja Gjosha theksoi se në këtë mënyrë jo vetëm në Ballkanin Perëndimor, por për gjithë Europën garantohet më shumë siguri dhe stabilitet.
Më tej ministrja Gjosha u ndal tek 5 prioritetet, duke shprehur falenderime për gjithë vendet anëtare, Komisionin Europian të cilët kanë njohur progresin që Shqipëria ka bërë me këto përparësi kyçe.
“Raporti i muajit tetor për Shqipërinë është një dokument që ne na ka ndihmuar të adresojmë edhe më qartë të gjitha rekomandimet e Komisionit Europian. Qeveria shqiptare ka ndërmarrë një sërë reformash dy vitet e fundit, reforma shtetndërtuese me rëndësi madhore për vendin. Ne jemi të vendosur që të mos ndalemi, me bindjen se para së gjithash këto refofma i shërbejnë qytetarëve”, tha Ministrja Gjosha.
Christensen u shpreh se ardhmja e Shqipërisë është në BE. Ai nënvizoi se Danimarka mbështet çdo përpjekje të Shqipërisë për tu afruar me BE-në përmes përmbushjes së standardeve.
Në mbyllje të vizitës së saj, ministrja Gjosha zhvilloi një takim me Zv. Kryetarin e Social Demokratëve, në Danimarkë, z. Mogens Jensen. Gjatë këtij takimi theksi u vu tek rëndësia e reformës në drejtësi për të përparuar me procesin e integrimit.
Ministrja Gjosha u shpreh se pas miratimit, zbatimi i kësaj reforme do të kërkojë kohën e saj dhe për Shqipërinë dhënia e një rekomandimi nga Komisioni për hapjen e negociatave do të ishte shtysa më e mirë për implementimin e saj në vijim, përmes kapitujve 23 dhe 24.
“Sigurisht ne jemi të vetëdijshëm dhe kërkojmë që vlerësimi i Shqipërisë të bëhet mbi parimin e meritës, por siç dëshmon dhe raporti i këtij viti, në pjesën më të madhe të prioriteteve ne jemi në nivele të përafërta ose të njëjta me vende qe kanë hapur negociatat me BE-në. Me reformën në drejtësi marrja e një rekomandimi do ti jepte Shqipërisë një shtysë edhe më të madhe për të vazhduar punën për të përmbushur kushtet”, tha Ministrja Gjosha.
