Dy punonjës të bashkisë Maliq kanë rënë në prangat e policisë.
Mësohet se arrestimi i dy punonjësve është bërë mbrëmjen e djeshme, pas informacioneve se vendosnin skedina në telefonat e tyre.
Komisariati i Maliqit ka ushtruar kontroll në lokalin e njërit prej të arrestuarve (në pronësi të babait) në fshatin Plasë, ku janë gjetur telefona që kishin vendosur baste sportive. Ndër të tjera, në telefonat e dy të arrestuarve janë gjetur komunikime në whatsapp ku ata vendosnin shuma të ndryshme lekësh në skedina.
Dyshohet se janë më tepër se 150 skedina të vendosura brenda një periudhe të shkurtër, thuajse një muaj.
Të dy punonjësit e bashkisë me iniciale K.Sh. dhe S.F. u arrestuan pas konstatimit të bisedave dhe fotove të skedinave që i mbanin nëpër telefona, si edhe programit që i vendosnin këto baste sportive.
Për të arrestuarit rëndojnë disa vepra penale si “organizimi ose ushtrimi i veprimtarive të lojërave të fatit në kundërshtim me ligjin”, “vënia në dispozicion për lojëra të palejuara” dhe “fshehja e të ardhurave”.
/a.r
