“Kur dy shtete përplasen, shumë fate njerëzish të gjendur midis përmbysen. Por kur përplasja ndodh midis dy shtetesh komuniste, gjithçka është dyfish dramatike. Kjo është historia e një grumbulli grash të huaja që ashtu si sorkadhet e trembura, u gjendën befas midis kacafytjes së dy shteteve të bllokut komunist. Ky film është nje requiem për këto gra…”
Me këtë reflektim, Ismail Kadare ngre siparin e skenarit të tij të parë për një film artistik, që shumë shpejt do të riadaptohet për ekranin e madh përmes objektivit të mjeshtrit të kinemasë ruse, Alexander Sokurov.
Kjo është historia e grave të bllokut të lindjes, të cilat përjetuan në Shqipëri vuajtjen e dashurisë së pamundur dhe ferrin komunist.
Adaptimi i skenarit të Kadaresë i është besuar estetit dhe skenaristit rus, Juri Arabov, i cili në vitin 2005 u vlerësua me çmimin për “Skenarin më të mirë” në Festivalin e Kanës, për filmin “Moloch”, një tjetër bashkëpunim me regjisorin Sokurov, ndërkohë që në vitin 2008 ishte pjesë e jurisë së Festivalit të filmit në Venecia.
Sokurov njihet për një gjuhë të thellë poetike dhe një trajtim personal të karaktereve, ç’ka premton për shikuesit një film “autor” të niveleve ndërkombëtare. Ai është fitues i një sërë çmimesh, përfshirë këtu edhe “Luanin e Artë” për filmin “Faust”.
Së shpejti aktorët do të nisin xhirimet, të cilat do të mbahen në qytetin e Gjirokastrës dhe në Tiranë, si një mënyrë për të përcjellë qartësisht universin letrar të Kadaresë dhe këndvështrimin e tij mbi historinë e Shqipërisë.
