Ndërsa në disa rajone në Kinë ka pasur infeksione prej COVID-19 në rritje, organet e pushtetit vendor po marrin masa të shpejta e të sakta për të parandaluar rastet e rënda, për të mbrojtur shëndetin e njerëzve dhe për të ngritur një pengesë kundër epidemisë.
Këto masa përfshijnë ofrimin e trajtimit mjekësor në kohën e duhur, plotësimin e nevojave mjekësore, përmirësimin e shërbimeve shëndetësore për të moshuarit dhe grupet e tjera kryesore, nxitjen e vaksinimit ndaj COVID-19 dhe forcimin e parandalimit e të kontrollit të epidemisë në zonat rurale.
Në ditët e fundit, shumë qytete kineze kanë hapur klinika për trajtimin e etheve në pallate sporti ose kanë shndërruar kabinat e testimit të acidit nukleik në klinika të përkohshme, disa prej të cilave funksionojnë 24 orë në ditë, për të lehtësuar presionin mbi trajtimin mjekësor.
Përveç kësaj, institucionet mjekësore në të gjitha nivelet po optimizojnë procedurat, po zgjerojnë burimet dhe po rritin personelin mjekësor në detyrë për të bërë çdo përpjekje për të trajtuar nevojat urgjente dhe shqetësimet e pacientëve.
Komisioni Kombëtar i Shëndetësisë ka kërkuar nga institucionet mjekësore bazë të krijojnë regjistra për grupe të posaçme, si të moshuarit që jetojnë vetëm, gratë shtatzëna dhe pacientët me probleme shëndetësore bazë, për të siguruar shërbimet mjekësore të nevojshme.
Në përgjigje të mungesës relative të burimeve të shërbimit shëndetësor në zonat rurale dhe lëvizjes së shtuar të njerëzve gjatë Vitit të Ri dhe Festës së Pranverës, kur njerëzit që punojnë në qytete shpesh kthehen në vendlindjen e tyre, organet e pushtetit vendor po forcojnë parandalimin dhe kontrollin e epidemisë dhe shërbimet shëndetësore në zonat rurale.
Për shembull, në qytetin Jiaozhou në provincën lindore të Kinës Shandong, komisioni shëndetësor ka ngritur 536 pika mjekësore në lagje dhe ka organizuar 446 punonjës mjekësorë dhe vullnetarë për të ofruar shërbime mjekësore në fshatra.
Në fund të nëntorit, Kina publikoi një plan pune për të shtuar përqindjen e vaksinimit të të moshuarve.
Masa të tilla si “kanalet e gjelbra” për të moshuarit janë marrë në vende të ndryshme për të rritur normën e vaksinimit.
