Pothuajse dy javë më parë, Kina kreu me sukses uljen e vet të parë në Mars, duke tërhequr vëmendjen e botës dhe duke shënuar një moment të rëndësishëm në eksplorimin hapësinor.
Të premten, ideja e shkencës dhe teknologjisë si mbështetje strategjike për zhvillimin kombëtar, duke u përqendruar në zhvillimin e pavarur dhe inovacionin, u theksua edhe një herë në programin e zhvillimit të vendit në Kongresin e 10-të Kombëtar të Shoqatës së Shkencës dhe Teknologjisë të Kinës të zhvilluar në Pekin
Për kthimin e Kinës në një vend udhëheqës në shkencë e teknologji dhe ngritjen e nivelit të vetëmbështetjes dhe vetëmjaftueshmërisë tekniko-shkencore nevojitet përshpejtimi i përpjekjeve, tha presidenti kinez Xi Jinping në fjalën e vet para rreth 3 000 pjesëmarrësve.
Duke vënë në dukje rëndësinë e përparimeve në teknologjitë thelbësore në fushat kryesore, presidenti Xi theksoi ndërtimin e një sistemi modern shkencor dhe teknologjik me konfederata inovacioni të drejtuara nga ndërmarrjet kryesore, të mbështetura nga universitetet e institucionet dhe të bashkërenduara nga subjektet e inovacionit.
Ai vuri në dukje se është e nevojshme të nxitet zgjidhja e problemeve në detyrat kryesore tekniko-shkencore, duke synuar problemet më të ngutshme dhe duke u nisur nga nevojat e menjëhershme dhe afatgjata të vendit.
Studimet themelore dhe origjinale janë kyçe për zgjerimin e kufijve të njohurive të reja, shtoi ai.
Synimi i Kinës për pavarësi në risitë shkencore pasqyrohet në arritjet e saj të ndryshme, duke përfshirë Sistemin e Navigimit Satelitor “Beidou”; kërkimin hapësinor, duke përfshirë sondat e Hënës e Marsit dhe ndërtimin e stacionit hapësinor kinez, dhe mjetin zhytës të thellësive të mëdha “Fendouzhe”. Kina gjithashtu ka zhvilluar teknologjitë e veta të hekurudhës me shpejtësi të lartë, komunikimit 5G dhe inteligjencës artificiale.
Presidenti Xi theksoi gjithashtu rolin e laboratorëve kombëtarë dhe institucioneve të kërkimit shkencor, universiteteve të nivelit të lartë dhe ndërmarrjeve kryesore tekniko-shkencore, duke kërkuar prej tyre të kenë arritje tekniko-shkencore më strategjike e kryesore dhe të përpiqen të zgjidhin problemet kryesore shkencore e teknologjike që ndikojnë në zhvillimin e përgjithshëm dhe interesat afatgjata të Kinës.
Të rëndësishme janë përpjekjet në kultivimin e personelit tekniko-shkencor të nivelit të lartë me ndikim global, duke mbështetur në mënyrë të qëndrueshme një numër ekipesh inovacioni dhe duke trajnuar më shumë personel teknik e të kualifikuar me cilësi të lartë, tha Xi.
Presidenti kinez gjithashtu përshëndeti punonjësit tekniko-shkencorë në mbarë vendin në prag të Ditës Kombëtare të Punonjësve të Shkencës dhe Teknologjisë të Kinës, e cila është më 30 maj.
