Analisti Mentor Kikia ka bërë përgjegjëse shoqërinë për vrasjen e 14-vjeçarit ditën e sotme në Tiranë, pas një sherri mes adoleshentëve.
Komentet Kikia i bëri në emisionin ‘Debat’ me gazetaren Alba Alishani në A2 CNN, ku tha se e gjithë shoqëria rendi pas të drejtave të fëmijëve gjatë këtyre viteve, por nuk foli për detyrimet e tyre.
Ai shtoi gjithashtu se në ditët e sotme, adoleshentët pas grindjeve kryesisht për vajza dhe atyre në rrjetet sociale, shkojnë për t’u sqaruar poshtë urave, ose në rrugica, pa ditur se njëri prej tyre mund të ketë thikë me vete.
“Këta fëmijë që janë përleshur sot, nuk është një skenar që ndodhi në mënyrë krejt të beftë, por është një rrjedhojë. Çfarë ndodh me grupet e adoleshentëve, grinden për një vajzë, për një sherr në rrjetet sociale.
Njësoj siç ndodhi në Fier dhe pastaj shkuan të sqarohen poshtë urës dhe u vra ai adoleshenti në Fier. Këta kanë shkuar të sqarohen në një rrugicë aty, pa e ditur që njëri prej tyre e ka thikën me vete. Këto janë adoleshentë që e demonstrojnë sjelljen e tyre të dhunshme e problematike.
Çfarë bëjnë prindërit, ku janë? Në mënyrë absolute përgjegjësia bie fillimisht te prindi, që e çon fëmijën në shkollë edhe i thotë ma eduko ti, ma bëj të devotshëm. Vetë disiplina në shkollë është shthurur, sepse vetë ne si shoqëri rendëm pas të drejtave të fëmijëve dhe nuk folëm për detyrimet e tyre”, tha Kikia.
