Pas operacionit të policisë, nisur mëngjesin e sotëm për kapjen e të ashtuquajtur “Eskobar i Ballkanit” ka reaguar vëllai i Klement Balilit, Hektor Balili.
Ai akuzon policinë se po vepron pa urdhër arresti, ndërkohë që jep edhe detaje për vendin ku ndodhet i vëllai.
Në një prononcim për Top Channel, ai thotë se për vëllain e tij, Klement Balili nuk ka asnjë urdhër arresti dhe shton se gjithçka që po qarkullon në publik rreth tij është e gjitha një lojë politike.
Hektori deklaron se Klementi, jo vetëm që nuk është arratisur, por madje vijon jetën e tij normalisht.
“Klementi këtu ka qenë tërë kohës. Sot u nis në Tiranë për dokumente, sepse për atë nuk ekziston urdhër-arresti. Kjo është e gjitha një lojë politike”, shprehet ai.
Mëngjesin e sotëm, rreth 200 forca policie, të Policisë se Shtetit, forcat e lëvizshme operacionale, të ndihmuar nga efektivët e Sarandës dhe të Gjirokastrës kanë nisur operacionin për prangosjen e Balilit, pagëzuar nga mediat greke si ‘Eksobari i Ballkanit’.
Burime për “Panorama” bën me dije se “Në Sarandë, Forcat e Ndërhyrjes së Shpejtë kanë ushtruar kontroll me urdhër të Krimeve të Rënda në kompleksin ‘Santa Quaranta’ dhe në disa prona e banesa te tjera të Klement Balilit”.
Në sitë do të kalojnë gjithë bizneset e Balilt, banesa dhe gjithë vendet e dyshuara ku mendohet se ai mund të strehohet.
Kontrollet bëhen në kuadër të hetimit që ka nisur për përfshirjen e tij në trafik ndërkombëtar të drogës dhe vijnë fill pas ardhjes së dosjes nga Greqia në adresë të tij./a.m.
